Horta Nia Domin ba EhD Laiha Rohan

Smnewstl.com – Prezidénsia Repúblika, tersa, kuarta no kontinua kinta-feira ne’e, kontinua fó apoiu sosiál ba família ema ho difisiénsia (EhD) iha Postu-Administrativu Fatululik, Fohorem, Tiliomar, Zumalai no Fatumea, Munisípiu Covalima.

Apoiu sosiál hanesan Fós, mina ba tein, parsél ba hahan inklui Kulsaun, oferese liu husi Asesesoria assuntu Inkluzaun Sosiál-Prezidénsia Repúblika. Apoia ne’e fó husi uma ba uma ne’ebé ema ho difisiénsia sira hela ba.

Iha intervensaun, Assesór Prinsipál Assuntu Inkluzaun Sosiál informa, “Apoiu ne’e hanesan kontinua Polítika Prezidente Repúblika atuál ba assuntu inkluzaun sosiál atu labele husik ema ida iha kotuk no hatudu domin ba sira (EhD) no atu fanun polítika guvernante sira atu tau matan ba ema ho difisiénsia iha area rurál”, tenik Gaspar Afonso nu’udár Assesór Prinsipál Assuntu Inkluzaun Sosiál.

Afonso Gaspar informa liutan, loloos la’ós de’it apoia sasan (Sosiál) maibé oinsa ho vizita ne’e atu hare sira nia kondisaun moris inklui enkoraza sira no ba futuru, halo polítika ida atu halo atendimentu di’ák liutan ba sira iha area rurál liu-liu sira ne’ebé hela iha área izoladu liu.

Família ema ho difisiénsia sira ne’ebé seidauk hetan apoia sosiál ne’e, reprezentante EhD iha Gabinete Palásiu Prezidensiál esplika katak sei la halo diskriminisaun ba ema ida no esforsu katak ba oin sei hetan hotu apoiu sosiál ne’ebé oferese husi Prezidénsia Repúblika tamba programa ne’e mai husi inisiativa Prezidente Repúblika Ramos-Horta desde nia mandatu da-ruak iha 2022.

Entretantu, Xefe Aldeia Belulik-Kraik, Suku Belulik-Leten, Postu-Administrativu Fatumea, reprezenta família ema ho difisiénsia ho matan-wen, expresa nia agradesimentu ba Xefe Estadu atuál.

“Ha’u sente kontente no agradese tamba ami nia komunidade ema ho difisiénsia sira hetan apoia husi Prezidente Repúblika”, expresa Xefe Aldeia Belulik-Kraik, Alfredo de Araujo.

Antes to’o iha munisípiu Covalima, loron rua ba kotuk ( 15 Abríl), ekipa inkluzaun sosiál hala’o uluk atividade apoia sosiál iha munisípiu Bobonaro, iha Postu-Administrativu Bobonaro no Lolotoe ho totál benefisiáriu na’in 15 no loron tuir mai kontinua iha munisípiu Covalima iha Postu-administrativu Fatulik, Fohorem, Tiliomar no Fatumea hamutuk na’in 44 inklui Zumalai iha família ida sai benefisiáriu nune’e totál husi munisípiu Bobonaro no Covalima, iha benefisiáriu hamutuk nain 60. (*/Smnews)