Horta-Lu-Olo ho Lere Anan Timur, Lelahuno : Os Verdes Sei Deside Iha Kongresu 12 Fevereiro 2022

Smnewstl.com 30-01-2022 (Dili) — Partidu Os Verdes de Timor realiza Domingu ne’e, reuniaun konsultativu konsellu lideransa inisiador ho konsellu lideransa munisipal hodi rona membru sira-nia hanoin koletiva ida nune’e deside fó apoiu bá kandidatu Prezidente Repúblika.

Reuniaun konsultativu ne’e maioria membru sira husi nasionál to’o munisípiu depozita sira-nia konfiansa tomak bá Prezidente Partidu Os Verdes de Timór, hamutuk ho estrutura atu deside fó apoiu bá kandidatu ne’ebé iha planu vizaun di’ak bá Timor-Leste.

Entre Kandidatura sira-ne’e, kandidatu na’in tolu hanesan, José Ramos-Horta, Francisco Guterres Lú-olo no Lere Anan Timur mak sai nu’udar kandidatu forte bá estrutura Partidu Os Verdes de Timor atu deside iha loron 12 fulan Fevereiru tinan ida-ne’e.

Prezidente Partidu Os Verdes de Timor, António Lelahunu Cruz hateten, Os Verdes de Timor seidauk realiza kongressu nasionál hodi hili sira-nia estrutura.

Tan ne’e, liu husi reuniaun konsultativu nasionál ne’e, nu’udar instrumentu ida hodi deside futuru kandidatura Prezidente Repúblika ne’ebé Os Verdes sei fó apoiu.

“Ne’eduni ami uza instrumentu konsultativu nasionál ida atu deside futuru kandidatura ne’ebé mak Partidu Os Verdes sei fó nia apoiu,” dehan Prezidente Os Verdes de Timor, António Lelahunu Cruz, iha salaun Katedral, Dili, domingu ne’e.

Nia hatutan, enkontru konsultativu nasionál ne’e mós iha aklamasaun husi membru sira hotu bá Prezidente Partidu Os Verdes de Timor atu halo komunikasaun polítika ho kandidatura Prezidente Repúblika ne’ebé mak rejístu ona, notariádu no Tribunál Rekursu.

Nia relata, Partidu Os Verdes de Timor halo ona komunikasaun polítika ho Kandidatu PR, Tenente Jenerál reformadu Lere Anan Timur, tan ne’e, tempu badak sei halo mós ho Kandidatu PR, Francisco Guterres Lú-olo no José Ramos-Horta.

“Prezidente sei halo tan komunikasaun ho kamarada Lú-olo no mós José Ramos-Horta, tanba ami antes ne’e halo ona komunikasaun ho ita-nia aman Lere Anan Timur ami rona ona, ami sei hakarak rona mós ita hotu nia aman Ramos-Horta, mais ou menus nia hanoin hanusa, vizaun saida mak atu lori karik Verdes mós bele inklui iha entendimentu polítiku iha Kandidatu sira-ne’e,” tenki nia.

Entretantu, Partidu Os Verdes de Timor sei realiza enkontru alargada naisonál iha Tasi-Tolu, nune’e bele anunsia kandidatu ne’ebé mak Verdes de Timor sei fó apoiu.(ant)