Horta Konvidadu Nu’udar Júri Internasionál Bá Prémiu Fraternidade Umana

Smnewstl.com 14-10-2021 (Dili) – Santu Padre Papa Françisco ho Imam Mesquita Alajar iha Cairo, Professór Tayep konvida Premiadu Nobel da Páz, José Manuel Ramos-Horta bá Roma Vatikanu, tanba konvidadu hanesan membru júri internasionál kona-ba prémiu fraternidade umana.

Iha loron, 9 fulan Outubru liu bá, eis Prezidente Repúblika ne’e, halo viajen bá Roma Vatikanu, tanba simu konvida husi Líder Boot Igreja Katólika, Papa Françisco ho Líder Boot Musulmanu nian iha mundu hodi sai hanesan membru Júri bá prémiu internasionál sobre fraternidade umana iha Roma Vatikanu.

“Ha’u bá Roma ne’e nu’dar membru júri internasionál bá prémiu internasionál ida fraternidade umana. Prémiu ne’e halo parte inisiativa Amu Papa nian ho Imam boot Cairo iha mundu ne’e mak Professór Tayep, nia mak Imam Mesquita Alajar iha Cairo,” informa, eis PR, José Ramos-Horta, iha aeroportu Como, Dili. Kinta ohin. Hafoin fila husi Roma.

Horta haktuir, iniastiva hamosu prémiu fraternidade umana ne’e, mai husi líder Igreja Katólika mundiál, Papa Fraçisco ho Líder Boot Musulmanu mundu ne’e, Professór Tayep, iha momentu istóriku mundu bainhira líder rua ne’e hasoru malu iha tinan 2019.

“Amu Papa ho grande Imam hasoru malu iha 2019 iha viajen enkontru istóriku entre líder katóliku ho líder musulmanu boot, tuir sekuénsia ne’e sira deside kria instituisaun ida halo prémiu ne’e par fó bá ema individual ou instituisaun ruma ké promove di’ak bá fraternidade umana, solidariedade umana,” subliña Horta.

Júri bá prémiu internasionál kona-ba fraternidade umana ne’e rotativa, tanba ne’e, eis Premiadu Nobel da Páz ne’e, sei assume responsabilidade hanesan júri hahú husi tinan 2021 to’o 2022.

“Tinan-tinan júri ne’e muda, tinan 2021-2022 ha’u simu konvite halo parte, kardeal ida nia mak reprezenta Amu Papa iha júri ne’e, tenki ko’alia ho Amu Papa, ami tenki ko’alia ho Imam ne’e, mas ami kuandu halo servisu, estuda lee prosesu sira-ne’e hotu ami mak halo, mais sempre halo enkontru par tuir deklarasaun fraternidade umana Amu Papa ho Imam ne’e mak asina. Ne’e mak bá iha Roma, ami rona Amu Papa ko’alia, reuniaun privadu membru júri ho Amu Papa, enkontru Imama mós iha Roma ketak, klaru embora reuniaun ne’e ko’alia kona-ba fraternidade umana,” haktuir Horta.

Iha okaziaun ne’e, José Ramos-Horta mós promove kafé Timor nian bá Santu Padre Papa Françisco iha fatin santu Papa nian iha Roma, hodi akonsella Amu Papa Françisco atu hemu de’it kafé Timor nian, tanba kafé Timor morin no furak liu kafé husi nasaun seluk iha mundu.

“Kuandu reuniaun remata ha’u hatete bá nia, Amu Papa ita hemu kafé ga la’e, ha’u diskonfia ita hemu kafé, nia hetete ha’u hemu. Entaun Amu Papa ha’u lori kafé husi Timor mai, akonsella Amu Papa tenki hemu de’it mak kafé Timor ne’e ké di’ak liu. Ha’u hateten, kafé Timor nian di’ak liu Brazil nian, Kolombia, no Amu Papa hatete, di’ak liu mós Costa Rica nian, tanba Costa Rica nia kafé ne’e famouzu, ha’u dehan, sim di’ak liu, nia hamnasa. Ha’u husu bá nia, Amu Papa ha’u bele hatete bá povu tomak iha Timor, Amu Papa hemu de’it kafé Timor. Sim bele hatete bá,” Horta konta tuir.

Tanba ne’e, nia dehan, bá dala uluk, vizita lori produtu komersiál hodi halo promosaun iha Santu Padre Papa Françisco nian fatin ne’ebé konsideradu fatin santu nian.(ant)