Horta Hahu Preokupa Lejitimidade Aniceto Atu Fó Posse Bá PR Foun

Smnewstl.com 14-01-2022 (Dili) — Premiadu Nobel da Páz, José Ramos-Horta preukupa ho lejitimidade Prezidente Parlamentu Nasionál (PPN) atu fó tomada de posse bá Prezidente Repúblika (PR) foun periódu 2022-2027.

Tanba tuir José Ramos-Horta katak, durante tinan hirak ne’e nia laran, públiku kestiona konstitusionalidade no lejitimidade Prezidente PN, Aniceto Guterres.

“Problema ne’ebé ita define tiha ona tinan rua nia laran ké violasaun konstituisaun, oinsá atu retifika ida-ne’e, dezafiu boot bá Prezidente foun mai mak ida-ne’e, sé mak fó posse bá Prezidente foun, tuir ita-nia konstituisaun ita hatene sé mak fó posse, maibé ema bee atu fó posse ne’e iha lejitimidade ga la’e, tanba ita rona, tinan rua nia laran la’ós lejítimu,” dehan Premiadu Nobel da Páz, José Ramos-Horta, iha salaun Karedral, Dili, sesta ne’e.

Horta hatutan, posibilidade ohin sesta (14/01/22/), Prezidente Repúblika (PR) Francisco Guterres Lú-olo, dekreta ona kalendáriu eleisaun prezidensiál.

“Ohin karik Prezidente (Repúblika) deklara ona lei kalendáriu eleitorál, ita hatene ona kandidatu bar-barak bá Prezidénsia, maibé estadu ida-ne’e la funsiona de’it ho Prezidente, iha poder lejislativu, la’ós importante liu Prezidénsia, mais poder lejislativu ne’e mak sai poder ezekutivu,” dehan Horta.

Maski nune’e, Premiadu Nobel da Páz  akresenta, la’ós poder Prezidente Repúblika mesak mak importante, maibe mos poder lejislativu ka Parlamentu Nasionál (PN).

Tuir Horta, poder ezekutivu ho lejislativu mak determina bá viabilidade prioridade ne’ebé Prezidente Repúblika ho Primeiru-Ministru rasik konsiente katak, atu implementa prioridade 5 ou 10 ne’e, presiza liu husi eleisaun jerál

“Poder ezekutivu ho lejislativu mak determina depois viabilidade prioridade ne’ebé Prezidente Repúblika rasik fi’ar, hanoin Primeiru-Ministru rasik fi’ar hanoin, prioridade 5 ka 10 ka identifika, ne’e atu ezekuta tenki liu husi eleisoens jerais,” tenik nia.(ant)