Horikalan, Autoridade Indonesia Kaer Sidadaun Timoroan 113 Inklui Feto 8 Iha Atambua

SMNewstl.com-Ekipa konjunta husi Polisia Belu Nasaun Republika Indonesia konsege kaer sidadaun timoroan atus ida sanulu resin tolu (113), iha Atambua hafoin konsege ilegalmente ultrapasa Fronteira entre nasaun rua.

Tuir informasaun ne’ebe SMNews asesu husi Media The East Indonesia komfirma katak, sidadaun hirak ne’e kapturadu iha oras tuku sia kalan, iha fatin rua mak hanesan Fatubenao A, Suco Fatubenao, Posto Atambua.

Husi total sidadaun 113 ne’e, nain 55 autoridade Belu asegura iha baraka emergensia ne’ebe lokalizado besik komunidade sira, enkuanto 58 seluk segurado iha uma komunidade ne’ebe sira hamahan a’an ba.

Total hamutuk sidadaun timoroan 113 maka konsege ilegalemente ultrapasa Fronteira. Entre sira kompostu husi mane 105 no feto nain 8.

Bazeia ba evidensia ne’ebe parte autoridade rekolha hanesan manu aman ne’ebe diskumfia utiliza ba graduasaun husi organzisaun arte marsiais balun.

Sidadaun hirak refere hamutuk ho evidensia asegurado ona iha Quaetel Polisia Belu Indonesia hodi hein kontinuasaun prosesu.

Ligado ho ne’e bainhira SMNews komfirma ho Komandante Unidade Patrulhamentu Fronteira, Superintendente Eculides Belo via telefone afirma, hetan duni informasaun, maibe sei iha hela prosesu. “Ita kontinua halao servisu, ne’e iha area juridisaun nasaun vizinho nian, portantu ita kontinua akompanha,”nia sublinha.(**)