Smnewstl.com 19-08-2022 (Dili) – Lídia dos Santos ho idade tinan 11 ne’ebé sofre moras kankru iha parte ain kuaze tinan-rua resin ona, Sexta-feira ne’e desloka ona ba Indonesia hodi halao tratamentu iha ospitál MRCC Siloam Hospitals Semangi iha Jakarta Indonézia.
Molok desloka ba Indonézia, iha Aeroportu Internasionál Prezidente Nicolau Lobato, pasiente Lidia dos Santos hetan vizita husi Prezidente Repúblika, José Ramos-Horta hodi fó korajen nune’e nafatin forsa hodi tau esperansa ba maromak hodi bele rekopera.
Aman husi Lídia dos Santos, Julião dos Santos Gonçalves ba jornalista, agradese ba Prezidente Repúblika, José Ramos-Horta ho ekipa iha Palásiu Prezidente, tanba bele fasilita ona nia oan Lídia dos Santos hodi ba halo tratamentu saúde iha Indonézia.
“Tinan-rua resin ona, nia moras kankru tula kona husi ain, ne’ebé infeksi husi laran ne’e mak sai bubu boot hanesan ne’e. Ha’u fó obrigadu ba Xefe Estadu, tanba durante ne’e ajuda ha’u, tanba durante ne’e ha’u mesak labele, husi estadu halo dokumentu sira-ne’e akompaña ha’u-nia oan ohin atu aranka ba Indonézia,” Julião dos Santos Gonçalves dehan.
Julião haktuir, bainhira Lídia hahú eskola, nia komesa sente ona moras iha parte ain, maibé nia sei kontinua ba eskola, nune’e atu tama iha ezame ba segundu periódu, nia ain komesa moras makas, nune’e nia tenki para eskola.
“Laiha, nia eskola 4 klasse, eskola iha SDK Aipelu, durante nia eskola ne’e mós nia ain ne’e sei moras hela seidauk bubu, atu ba tristes segundu ne’e mak akontese nia la ba tiha eskola,” hateten Lídia nia Pai.
Julião dos Santos Gonçalves espera, ho apoiu husi estadu nian ne’e, , nia oan Lídia dos Santos bele rekopera lalais hodi kontinua nia estudu.
Lídia dos Santos oan husi Aman Julião dos Santos Gonçalves no Inan, Delfina dos Santos. No adauk ne’e, sira hela iha suku Lauhata Postu Administrativu Bazartete Munisípiu Likisá.
Lídia dos Santos dadauk ne’e klasse 4o iha Eskola Bázika Aipelu Munisípiu Likisá.(rio)
Komentariu