Hatama Sasán Ilegál, Ema Nain 5 Tama Tribunal

Smnewstl.com 03-09-2021 (Dili) — Tribunál Distritál Dili (TDD), liu husi julgamentu primeiru interrogatóriu aplika medida koasaun aprezentasaun periódika bá arguidu na’in 5 ne’ebé hatama sasán kontra bandu ho ilegalmente mai Timor-Leste liu husi via marítima.

Iha loron 31 fulan Agostu foin lalais ne’e, Unidade Polísia Marítima (UPM) kaptura sidadaun na’in 5, Timoroan na’in 4 no sidadaun indonézia ida ne’ebé hatama sigaru joker hamutuk karton 40 husi Atapupu Indonézia mai Timor-Leste iha area Dolok-oan iha tuku 2 ho balun madrugada.

UPM mós prende evidénsia balun hanesan kareta baskolante ida, kareta swift ida, motorizada beat ida, ró bero ida, objetivu hirak ne’e uza hodi transporta sasán sira-ne’e bainhira to’o iha Timor-Leste.

Defeza Marito da Silva hateten, ministériu públiku imputa bá arguidu na’in 5 ho krime kontra bandu ne’ebé pervistu iha artigu 316 kódiku penál Timor-Leste.

Nune’e liu husi prosesu investigasaun ne’ebé to’o iha julgamentu primeiru interrogatóriu, ministériu públiku mak husu tribunál aplika medidas aprezentasaun peródika bá nia kliente sira, nune’e atu prevene aan hodi hein prosesu investigasaun tuir mai.

“Horserik julgamentu no ohin rona ninia kontinuasaun bá desizaun. Iha prosesu ne’e Ministériu Públiku aplika bá kliente kona-ba kontra bandu ne’ebé prevístu iha kódiku penál 316, iha ne’e ninia prosesu ne’e la’o no investigasaun to’o mai iha primeiru interrogatóriu ida-ne’e, Ministériu Públiku husu medidas ne’ebé adekuadu bá arguidu sira mak aprezentasaun periódika,” dehan Defeza, Marito da Silva, hafoin remata julgamentu iha TDD sesta ohin.

Bá arguidu timoroan na’in 4 ne’e, tribunál aplika aprezentasaun periódika semana ida dala ida bá Ministériu Públiku, enkuantu sidadaun ne’e tribunál aplika medidas hanesan semana ida dalarua bá Ministériu Públiku iha loron Segunda ho Sesta, nune’e hodi hein prosesu investigasaun.

“Iha aprezentasaun periódika ida-ne’e aplika bá iha Timoroan na’in 4 Indonézia na’in ida, Indonézia ne’e Ministériu Públiku husu par atu bá iha preventiva, maibé haree sirkunstánsia tribunál foti medidas seluk mak mediidas aprezentasaun periódika semana ida dalarua segunda ho sesta bá sidadaun Timor na’in 4 ne’e semana ida dala ida,” hateten nia.

Marito da Silva hatutan, objetivu hanesan kareta, motorizada, ne’e tribunal apura ona, no husu atu entrega fila-fali bá na’in, enkuantu sigaru joker karton 40 ne’e kontinua prende, tanba sei iha hela prosesu investigasaun.

“Kona-ba objetivu ne’ebé sai prinsipál mak objetivu ida-ne’ebé indika hela pohon sabu (joker) 40 ne’e, agora objetivu ida-ne’ebé hanesan kareta apura tiha ona iha desizaun ne’e par tiha ona iha desizaun par atu fó fila-fali bá iha na’in kareta,” afirma nia.

Entretantu, julgamentu primeiru interrogatóriu ne’e preside husi Juíz Singulár Ivan Suritae, Ministériu Públiku reprezenta husi Prokuradór Adérito Tilman, arguidu timoroan na’in 4 hetan asisténsia legal husi advogadu privadu, Marito da Silva, no arguidu CM sidadaun Indonézia ne’e hetan asisténsia legal husi Defensór Públiku, Rui Guterres.(ant)