Hasoru Xanana, Xina Hakarak Estabelese Akordu Kooperasaun Iha Área Hotu

Smnewstl.com – Governu Repúblika Xina hakarak estabelese akordu kooperasaun ho Governu Timor-Leste hodi akumula área importante hotu ne’ebé sei fó benefisiu ba dezenvolvimentu Timor-Leste.

Komprimisu kooperasaun ne’e hato’o direita hosi Ministru Adjuntu Negósius Estranjeirus Xina, Nong Rong, bainhira hasoru malu ho S.E. Sr. Primeiru-Ministru, Kay Rala Xanana Gusmão, hafoin reuniaun, iha salaun Gabinete Fronteira Marítima, Palasiu Governu, Dili.

Primeiru Ministru Xanana agradese no promote sei koordena ho membru governu sira atu haree programa governu nian hotu ba tinan lima ne’ebé aprezenta ona ba Parlamentu Nasionál, iha tempu besik, sei hatama iha akordu kooperasaun ne’e.

“Agradese tebes, ohin simu Ministru Adjuntu Negósius Estranjeirus Xina, ami ko’alia área lubuk ida, ne’e maka vise-ministru husu katak, karik bele iha tempu ne’ebé badak sei asina akordu ruma ba kooperasaun ba tinan lima ne’ebé akumula hotu área sira-ne’e”, informa PM Xanana Liu husi komunikadu ne’ebe Smnews asesu

Xefe Governu IX Governu Konstitusionál agradese, tanba Vise Ministru ne’e mós hasoru malu ona ho Prezidente Repúblika, José Ramos-Horta hodi afirma sira nia apoiu ba TL.

“Governu Xina akompaña ita-nia situasaun polítika, foin dadauk aprova programa, no sira hatene fulan hirak mai ita servisu maka’as. Ne’e duni, iha fulan-setembru tinan-ne’e Prezidente Repúblika, José Ramos Horta sei hasoru malu, ho Prezidente Xina, Xi Jinping, iha Xina” haktenik nia.

Iha fatin hanesan, Vise Ministru Nong Rong agradese bele hasoru malu ho Prezidente Repúblika, José Ramos-Horta no Primeiru-Ministru, Xanana Gusmão hodi hato’o direita sira -nia programa ne’e.

“Ha’u agradese tebes, ohin ami ho Primeiru Ministru Xanana diskute área koperasaun entre país rua kona-ba apoiu saida maka ami bele fó,” nia hatete.

Enkontru hosi Primeiru-Ministru Xanana no Vice Ministru Xina Nong Rong ne’ebe akompaña direita hosi Ministru Negósiu Estranjeiru no Kooperasaun Timor-Leste, Bendito dos Santos Freitas.

Hafoin enkontru ne’e Primeiru Ministru Xanana Gusmão ho Vice Ministru Xina Nong Rong entrega mós ró ai kiik, cafe Timor no Tais Timor ba malu nu’udar sinal agradesimentu.(Smnews)