Smnewstl.com 26-11-2021 (Dili) – Xefe Estadu Maiór Jenerál Forsas Armandas, Brigadeiru Jenerál, Calisto dos Santos ‘Coliati’ hateten, instituisaun Falintil Forsa Defeza Timor-Leste (F-FDTL) haruka ona membru na’in-rua bá eskola iha nasaun Filipina ho Xina, nune’e bele prepara bá atu harii forsa Aereo iha Timor-Leste.
“Forsa aero foin dadauk ne’e ita haruka ona ita-nia ofisiál na’in-rua ne’ebé mós bá halo preparativus sira bá eskola, balun bá Filipina, balun bá Xina prepara par depois ita harii ita-nia forsa aereo,” dehan Brigadeiru Jenerál Coliati iha Kuartél Jenerál F-FDTL Fatuhada, Dili, sesta ne’e.
Xefe Estadu Maiór Jenerál Forsas Armandas ne’e dehan, formasaun iha área forsa Aereo ne’e depende bá tempu, bele iha tempu badak no tempu naruk, maibé, kona-ba tékniku aviaun tenki to’o tinan 5.
“Formasaun ne’e depende, kurtu prazu bá fulan 3 bá fulan 6 bá tinan ida. Bá aviadores sira bá tékniku aviaun ninian, ne’e presiza tenki tinan 5,” dehan nia.
Brigadeiru Jenerál Calisto dos Santos ‘Coilati’ informa tan katak, oras ne’e daduak, membru F-FDTL lubuk ida mak kontinua eskola iha nasaun hanesan, Amérika, Austrália, Xina no nasaun seluk tan.
Nia subliña, entre sira-ne’e, balun fila ona mai Timor-Leste, tanba Corona, maibé balun kontinua eskola nafatin.
“Estuda iha li’ur, lubuk ida sei iha hela Amérika, Austrália, balun fila mai tanba corona, maibé balun sei kontinua nafatin iha ne’ebá. Balun iha Xina, agora foin dadauk haruka tan fali balun bá tan Índia, bá fatin sira-ne’e par atu kontinua nafatin halo formasaun,” tenik nia.
Xefe Estadu Maiór Jenerál ne’e mós la mensiona área espesialidade ne’ebé membru sira-ne’e estuda bá, tanba segredu militár.
Maibé nia dehan, sira-ne’ebé iha Komponente Terrestre sei tuir formasaun iha área refere, hanesan mós ho área Komponente Naval no mós lojístika tuir área espesialidade ida-idak nian.(ant)
Komentariu