Hakat Ilegál ba Mota Sorin Indonesia Sae ‘Sinto’ Sei Hata’an Iha Lei

Smnewstl.com 30-08-2021 (Dili) — Polísia Nasionál Timor-Leste (PNTL) sei prosesa sidadaun hirak ne’ebé mak ultrapasa ilegalmente iha fronteira terrestre entre Timor-Leste ho Indonézia hodi bá sa’e sintu ‘sabuk’, bainhira remata ona karantina durante loron 14.

Porta-voz Komandu Jerál PNTL, Superintendente Xefe Arnaldo de Araújo konfirma, durante fulan Agostu tinan 2021 ne’e, PNTL kaptura sidadaun ne’ebé hakat ilegál iha fronteira hodi bá sa’e iha Indonézia hamutuk 153.

Sidadaun hirak ne’e, PNTL kaptura hafoin konsege bá sa’e sintu iha Atambua Indonézia, bainhira fila mai mak autoridade defeza ho seguransa ka’er, no dadauk ne’e iha hela karantina.

“Hakarak hatete tan mós katak, iha dia 14 to’o dia 31 de Agostu totál ema ne’ebé mak tama sai ilegál iha fronteira Bobonaru, Oe-cusse no Covalima hamutuk 153 pessoas, husi fronteira Bobonaru 44 pessoas, fronteira Covalima 33 pessoas, transasaun ilegál ema na’in 4, sa’e sintu ema na’in 37,” dehan Arnaldo de Araújo, iha Komandu Jerál PNTL Tersa ohin.

Nia hatutan, sidadaun ne’ebé tama ilegál iha fronteira terrestre Batugade Motaain hamutuk 76.

“Deportasaun husi portaun entrada Batugade Motaain hamutuk 76 pessoas, bá sira-ne’e hotu, balun agora dadauk sei iha karantina, balun ne’ebé sai ona ne’e prosesu tuir ita-nia prosedimentu legál ne’ebé mak iha, depois mak munisípiu ne’ebé sira pertense bá tama ilegál husi ne’ebá, sei enkamiña hotu bá iha Ministériu Públiku,” afirma nia.

Tanba ne’e, prosesu depois de 14 dias iha karantina, sei entrega bá iha munisípiu ne’ebé sira liu bá ne’e, sei halo prosesu tuir lei ne’ebé mak vigora ona iha Timor-Leste.(ant)