Grupu Mediador Husi Sudeste Aziatiku Sei Tulun Mediasaun Konflitu Iha Timor

Smnewstl.com-Dili, 27  Fevereiru 2023 Grupu Mediadór ho naran Southeast Asia Women Peace Mediators promete atu ajuda Timor-Leste hodi halo mediasaun konflitu.

“Hakarak fahe oituan kona-ba servisu sira ne’ebé mak halo tiha ona, no ami mós hakarak atu kolabora liután oinsá bele apoiu ba iha Timor-Leste, atu sai mós hanesan membru ASEAN, liu-liu fahe mós esperiénsia sira ne’ebé mak durante ami halo servisu sira sudeste aziátiku ninian, liu-liu ba iha servisu mediasaun nian, oinsá atu haree assuntu sira konflitu sira ne’ebé mak halo iha rejionál sira,” Hateten Mediadora husi Filipina, Miriam Coronel-Ferrer, hafoin hasoru malu ho Prezidente Republika.

Grupu husi Southeast Asia Women Peace Mediators mós prontu apoiu Timor-Leste atu sai membru ASEAN no prontu fahe esperiénsia balun ne’ebé bele tulun Timor-Leste.

“Señór Prezidente apresia tebes servisu ne’ebé mak ami iha, no mós iha enkontru ida-ne’e husu liu-liu ho esperiénsia sira ne’ebé mak ami iha nasaun sira ne’ebé diferente iha rejional ninian, entaun lori ida-ne’e mós hodi kolabora hamutuk ho señór Prezidente no mós apoiu ba Timor,” haktuir nia.

Durante ne’e, Grupu ne’e, mós halo ona mediasaun konflitu iha nasaun hanesan Cameron, Afganistão no seluk tan.

Entretantu, membru Mediador Dame ba Sudeste Aziátiku ne’e mai husi Cambodia, Filipina, Indonézia, Timor-Leste, Thailand, Malaysia no Myanmar.