Grupu Artezenatu 60 Partisipa Feira Natál iha Fundasaun Alola

Smnewstl.com 18-12-21 (Dili) — Fundasaun Alola realiza feira natál ne’ebé partisipa husi grupu artezenatu hamutuk 60 hodi fa’an sira-nia produtu lokál ne’ebé sira prodús hodi hasa’e rendimentu família inklui promove no prezera kultura identidade Timor nian.

Diretór Fundasaun Alola, Maria Imaculada Guterres hateten, feira natál ne’e sempre hala’o tinan-tinan ho objetivu atu promove produtu lokál ne’ebé prodús husi grupu artezenatu sira, no mós prozerva identidade kulturál Timor-Leste nian.

Alem de ne’e, liu husi produtu ne’ebé sira fa’an, hodi empodera ekonomia família nian, nune’e bele sustenta nesessidade uma laran.

“Objetivu feira natál ne’ebé Fundasaun Alola realiza ohin no aban ne’e mak atu promove produtu lokál ne’ebé mak ita-nia artezenatu sira iha, inklui mós atu prezerva kultura identidade Timor-Leste ninian, oinsá par atu tulun ita-nia grupu artezenatu sira par bele hetan rendimentu di’ak atu bele apoiu nesessidade família nian,” informa Diretór Fundasaun Alola, Maria Imaculada Guterres iha Alola Quintal Boot, Dili, sábdu ne’e.

Grupu artezenatu 60 ne’e, kompostu husi Munisípiu 12 inklui Rejiaun Administrativa Espesiál Oe-cusse Ambenu (RAEOA) ne’ebé antes ne’e hetan hetan ona apoiu kapasitasaun iha área skill negósiu, administrasaun no finansas inklui halo diversifikasaun bá produtu sira.

“Grupu ne’e husi Munisípiu 12 inklui RAEOA ne’ebé mak durante Alola apoiu liu husi kapasitasaun bá iha skill negósiu nian, administrasaun no finansas no mós oinsá halo diversifikasaun bá produtu sira-ne’ebé sira iha,” dehan nia.

Grupu artezenatu 60 ne’e, balun foun ne’ebé foin primeiru ves partisipa iha feira natál ne’e, no balun partisipa beibeik ona iha feira natál no Pascoa ne’ebé Fundasaun Alola realiza.

Sorin seluk, Reprezentante Embaixada Thailandia iha Timor-Leste, Sakollawat hatutan, Embaixada Thailandia servisu hamutuk ho Fundasaun Alola hodi hahú realiza feira natál ne’e desde tinan 2012 to’o agora.

“Suporta bá feira ida-ne’e barak ona, komesa husi 2012 to’o agora, atividade apoiu fundus husi Embaixada Thailandia ne’e bá dalarua iha tinan ida-ne’e,” dehan nia.

Fundus ne’ebé Embaixada Thailandia fó apoiu liu-liu iha kalamidade públika 4 Abríl no mós apoiu bá grupu artezenatu sira hodi transporta sira-nia produtu lokál hodi fa’an iha feira ne’e.

Nune’e mós, Koordenadór Grupu Haburas Kultura husi Ataúro, Elizeu da Costa Perreira sente kontente no agradese bá Fundasaun Alola, tanba tinan-tinan sempre realiza feira ne’e atu sira fa’an produtu ne’ebé sira prodús hodi sustenta nesessidade uma laran.

“Ha’u sente kontente tanba tinan-tinan Fundasaun Alola bele loke fatin feira ida-ne’e bá natál, ne’eduni ami kontente tanba bele fó netik rendimentu oituan ga barak ami bele aproveita netik iha natál nian,” dehan Elizeu.

Produtu ne’ebé sira prodús iha modelu oin 8, ne’ebé maioria artezenatu ukir ho aí ne’ebé nia espesie ema, manu, árvore natál, ró bero no seluk tan.

Alem de ne’e, tuir dadus ne’ebé Fundasaun Alola revela katak, feira natál iha tinan 2020, rendimentu ne’ebé grupu kreativu no artezenatu sira hetan husi fa’an sira-nia produtu hamutuk rihun $ 6.

Entretantu, feira natál ne’e halao durante loron 2, hahú husi dia 18 to’o dia 19 fulan Dezembru 2021 iha edifísiu Fundasaun Alola, tanba hetan apoiu husi Embaixada Thailandia iha Timor-Leste, no mós parseiru husi Mercy Corp ne’ebé prodús produtu husi resiklajen liu husi lixu sira hanesan plástiku, akua no seluk tan.(ant)