smnewstl.com – 28 Janeiru 2025 – Grigório da Cunha Saldanha – Mouris resigna-an ona hanesan Prezidente Autoridade Munisípiu – PAM Díli, kna’ar ne’ebé assume dezde fulan Marsu tinan 2024.
Sobrevivente 12 Novembru ne’e entrega ona funsaun ba governu iha Tersa-Feira ne’e, ba Ministériu Administrasaun Estatal, Tomás do Rosário Cabral, hodi enkamiña ba Primeiru Ministru, Kay Rala Xanana Gusmão, no hetan ona aseitasaun.
Ministru Administrasaun Estatal, Tomás Cabral admite katak, submissaun pedidu husi Griógorio Saldanga no deside hodi enkamiña ba Primeiru Ministru no hetan aseitasaun iha loron 14 fulan Janeiru.
Hodi hein substituisaun ho baze ho baze Dekretu-Lei nú 3/2016, loron 16 fulan-marsu, ne’ebé publika fila fali husi Dekretu-Lei nú. 84/2023, loron 23 fulan-novembru, kona-ba nomeasaun Prezidente Autoridade Munisipál ne’ebé kompeténsia exkluziva Primeiru Ministru nian, governu nomeia Diretur Jerál Desentralizasaun no Governu Lokál, hanesan PAM interinu.
Resignasaun Grigório Saldanha hanesan Prezidente PAM Díli, ho baze hanesan tuir mai, hanesan komunikadu ne’ebé sita husi Ministeriu Administrasaun Estatal.
Intensaun atu transfere Unidade Jestaun Projetu (PMU) husi Autoridade Munisípiu Dili (AMD) ba Ministériu Administrasaun Estatál (MAE) tau iha risku fiskalizasaun tékniku servisu limpeza urbana iha Dili, nomeadamente jestaun solidu munisipal lixu (MSW) no rekolla lixu manuál, tanba AMD depende krusialmente ba sira-nia apoiu;
Prolongamentu kontratu ba empreza limpeza urbana husi MAE, sem komunikasaun previa ho Autoridade Munisipiu Dili, maske empreza hirak ne’e ida tama iha “lista metan” iha Autoridade Munisipal Dili (AMD) tanba desobediénsia no abandona kna’ar durante semana ida.
Maske AMD nian atu hadi’a dezempeñu empreza limpeza sira nian, inklui akizisaun veíkulu foun sira hodi transporta lixu, no preparasaun prosesu selesaun foun ba tinan 2025, desizaun sira ne’ebé MAE halo kompromete esforsu sira.\
Hasai autoridade AMD nian kona-ba GMT (Jestaun Merkadu no Turizmu). Uluk iha ámbitu SEATOU nian, hamosu ona problema sira. Iha jestaun SEATOU nian, GMT hala’o aktu violénsia no na’ok hasoru vendedór ambulante sira no rezidente sira, lahó koñesimentu ka kontrolu hosi AMD, hodi hamosu atribuisaun responsabilidade sira ne’ebé la justu ba nia.
Nu’udar sidadaun, veteranu no PMA, Ha’u deklara Ha’u-nia opozisaun maka’as ba despeju no espulsaun rezidente no vendedór ambulante sira sein kria kondisaun mínimu, liuliu iha tempu udan, maski sira okupa espasu públiku sira. Ha’u konsidera prátika ida-ne’e hanesan kustu boot tebetebes ba povu Timor-Leste, ne’ebé, maski durante okupasaun Indonézia, kontribui ho desizivu ba luta ba independénsia.
Ho fundamentu ne’ebé sita iha leten tuir Grigório Saldanha, PAM, falta autonomia administrativa, tanba AMD nia dependénsia maka’as ba MAE, impede atu asegura preparasaun nesesária ba desentralizasaun governu lokál, hanesan estabelese husi polítika IX Governu Konstitusionál, prespesaun kona-ba tendénsia konsidera hanesan adversáriu ka inimigu husi polítiku ba IX Governu.
Grigório Saldanha rekorda katak, dezde assume kna’ar, hamutuk ho ekipa servisu hodi hadi’a administrasaun, kombate indisipliña, korrupsaun, nepotizmu no prátika familiár, tuir kompromisu sira husi Governu Konstitusional da-sia, maibé argumenta katak, esforsu atu halo auditoria ne’ebé daudaun ne’e la’o daudaun bele hamosu konflitu ho figura sira ne’ebé iha influénsia.
Ex PAM Díli deseza susessu ba susessór ne’ebé sei nomeia husi Primeiru Ministru Kay Rala Xanana Gusmão no agradese ba governu ne’ebe depozita ona konfiansa ba nia nuudar PAM durante liu fulan 10. (*/Smnews)
Komentariu