Governu TL ho Parseiru UNDP Sei Dezenvolve Mapamentu Rísku Bá Dezastre

Smnewstl.com 11-01-2022 (Dili) — Governu Timor-Leste liu husi Sekretáriu Estadu Ambiente no Sekretáriu Estadu Protesaun Sivíl (SEPS) hamutuk ho parseiru dezenvolvimentu UNDP sei dezenvolve mapamentu rísku bá dezastre nian ne’ebé integradu.

Sekretáriu Estadu Protesaun Sivíl (SEPS), Joaquim Gusmão informa, semináriu ne’e atu rona hanoin husi konsultan sira kona-ba kriasaun mapamentu rísku dezastre ho nia asessmentu bá rísku sira iha territóriu tomak, atu bele kria baze de dadus ida atu bele utiliza iha futuru.

Apoiu bá projetu ne’e rasik husi UNDP ne’ebé rekruta ekipa konsultan atu bele halo servisu durante tinan ida nia laran hodi kria mapa ida-ne’e.

“Mapa ne’e rasik kuandu hotu sira aprezenta, ita sei hatene mós kona-ba rísku dezastre nian iha territóriu tomak, rísku dezastre inklui dezastre inundasaun, rai halai, rai maran no mós ahi han nian, hodi nune’e iha bele uza mapa ne’e par hodi bele identifika ona, mais ou menus iha territóriu tomak ne’e, iha fatin ne’ebé mak iha rísku makas bá dezastre,” dehan SEPS, Joaquim Gusmão, iha salaun Suai Room Timor Plaza, Tersa-feira ne’e.

Sorin seluk, Sekretáriu Estadu Ambiente, Demétrio Amaral de Carvalho reforsa, Timor-Leste hetan apoiu fundu hamutuk milliaun $ 22.4 husi fundu klimátika verde hodi dezenvolve mapamentu ne’e.

“SEPS hamutuk ho UNDP liu husi fundu klimátika verde, fundu klimátika verde ne’ebé Timor-Leste hetan $ 22.4 milloens dólar amerikanu, parte ida atu dezenvolve mós Timor-Leste nia mapa bá multi hazzard muping, ne’e liga bá dezastre klimátika sira,” dehan Sekretáriu Estadu Ambiente, Demétrio Amaral.

Dezastre naturais ne’ebé sei integra iha baze de dadus bele mak dezastre sira-ne’ebé assosiadu ho induzaun klimátika hanesan, rai maran, bai loron naruk, rai halai, errozaun no seluk tan.

“Servisu ida-ne’e, UNDP halo assessment bá empreza internasionál ida naran Anthea ne’ebé sei ajuda ita dezenvole ita-nia mapa, espera Timor-Leste bele iha mapa interativu ida kona-ba rísku dezastre ninian,” subliña Demétrio Amaral.(ant)