Smnewstl.com — Primeiru-Ministru (PM), Kay Rala Xanana Gusmão oferese Ai-kameli oan hamutuk hun 60 bá Singapura, hanesan prezente ida hosi Governu Timor-Leste (TL) bá aniversáriu loron Independénsia Singapura nian bá dala 60 iha tinan ida-ne’e.
Serimónia entrega ai kameli oan hirak ne’e hala’o iha Salaun Pan Pacific Hotel iha ámbitu almosu hamutuk ne’ebé oferese hosi Primeiru-Ministru Singapura nian, Lawrence Wong, domingu (14/07/2025) no kuda iha Gardens by the Bay, segunda (15/07/2025).
Molok entrega, Embaixadór Timor-Leste iha Singapura, Alexandre Tilman introdús bá Primeiru Ministru Singapura, Lawrence Wong katak, ai-kameli hirak ne’e hanesan prezente bá Singapura ne’ebé komemora tinan 60 independénsia.
Iha okaziaun ne’e, Lawrence Wong agradese bá Primeiru-Ministru Xanana Gusmão no Governu Timor-Leste bá prezente úniku ai-sándalu 60 bá tinan 60 independénsia Singapura nian.
Primeiru-Ministru Singapura ne’e dehan, ai-oan sira-ne’e mak símbolu forte ida kona-bá oinsá nasaun rua bele buras no buras hamutuk iha tinan sira tuir-mai, tantu bilaterál no iha organizasaun rejionál Association of Southeast Asian Nations (ASEAN).
“Ha’u garante katak Singapura sei tau-matan didi’ak bá ai-oan sira no asegura katak sira sai ai-hun ne’ebé forte no metin; ne’ebé apropriadu bá amizade ne’ebé durantre tinan sira tuir mai entre ita-nia nasaun rua,” nia hateten.
Iha dalan hanesan, Singapura sei kontinua servisu hamutuk ho Timor-Leste no Primeiru-Ministru Xanana Gusmão hodi hametin parseria no lori bá to’o buat ne’ebé bo’ot liu-tán.
Lawrence Wong lori Governu no Povu Singapura nia naran dezeja saúde di’ak no susesu bá Estadu ho Governu Repúblika Demokrátika Timor-Leste (RDTL), bá saúde di’ak Prezidente Repúblika, José Ramos-Horta ho Primeiru-Ministru Xanana Gusmão nian; bá dame no prosperiedade no bá amizade ne’ebé dura entre nasaun rua nian.
Iha oportunidade ne’e Primeiru-Ministru, Kay Rala Xanana Gusmão parabeniza Estadu no Povu Singapura ne’ebé komemora aniversáriu independénsia bá dala-60 iha tinan ida-ne’e.
“Ha’u hato’o parabéns bá Prezidente Repúblika Singapura, Tharman Shanmugaratnam, Primeiru -Ministru, Lawrence Wong no povu Singapura tomak. Parabéns bá tinan 60 nasionalidade ne’ebé notável. Agradese bá amizade ne’ebé dura entre Timor-Leste ho Singapura,” PM Xanana parabeniza.
Serimónia entrega ai-kameli oan 60 ne’e, PM Xanana akompaña hosi Vise-Primeiru-Ministru no Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; Embaixadór Timor-Leste iha Singapura, Alexandre Tilman no Xefe Gabinete Primeiru-Ministru, Elizabeth Exposto.
Primeiru-Ministru Singapura, Lawrence Wong akompaña hosi Ministru Relasaun Exteriór Singapura, Vivian Balakrishnan.
Ai-kameli oan 60 ne’e Primeiru-Ministru, Xanana Gusmão bá kuda iha Gardens by the Bay ne’ebé hanesan dezenvolvimentu ida ho rai hektares 110 iha distritu Marina Bay iha Rejiaun Sentrál Singapura nian, ne’ebé lokaliza iha Rezervatóriu Marina.
Iha Fatin prinsipál tolu maka: Bay South Garden (iha Marina South), Bay East Garden (iha Marina East) no Bay Central Garden (iha Downtown Core no Kallang).
Foin lalais ne’e dezenvolve hosi Bay South Garden iha hektares 54 no jere hosi Grant Associates. (*/Smnews)
Komentariu