Governu Planu Aumenta Tan Postu Seguransa 25 Iha Fronteira TL-Indonézia

Smnewstl.com 30-09-2021 (Dili) – Primeiru-Ministru (PM), Taur Matan Ruak deklara, tempu badak, ministériu interior sei harii tan postu seguransa hamutuk 25 iha fronteira terrestre entre Timor-Leste ho Indonézia, nune’e bele miniza movimentu illegal iha zona fronterizu.

Xefe Governu hato’o assuntu ne’e, hafoin remata enkontru semanál ho Prezidente Repúblika (PR), Francisco Guterres ‘Lúolo’ iha rezidénsia ofisiál Xefe Estadu nian iha faról, Dili. Kinta ohin.

“Ida seluk mak ha’u informa oituan bá suaexelénsia Prezidente (Repúblika) kona-ba esforsu ami-nian, liu-liu ministériu interior nian atu aumenta númeru de postus fronteira, fronteira tomak ita iha postu 30 resin, iha tinan ida-ne’e ita aumenta husi 24 to’o 25,” dehan PM Taur.

Taur Matan Ruak hatutan, postu seguransa 25 ne’e sei harii ho orsamentu husi fundu Covid-19 nian, inklui kontribuisaun husi parseiru dezenvolvimentu internasionál husi Austrália.

“Ne’e investimentu husi fundu Covid-19 orsamentu 2021 no mós kontribuisaun parseiru dezenvolvimentu hanesan Austrália. Entaun ha’u espera katak, ho aumentu númeru postu sira-ne’e bele miniza númeru pasajen ilegais iha fronteira,” dehan Xefe Governu ne’e.

Entretantu, durante enkontru, PM Taur mós informa bá PR Lúolo kona-ba preukupasaun ne’ebé diskuti ho Embaixadór Indonézia iha Timor-Leste, Sahat Sitorus, liu-liu bá futuru, nasaun rua ne’e hamutuk halo jestaun ne’ebé iha freonteira.

“Por últimu ha’u mós informa oituan bá suaexelénsia Prezidente da Repúblika kona-ba ha’u-nia enkontru despedida ho Embaixadór Indonézia ké ha’u levanta mós assuntu ida-ne’e, i iha konversasaun di’ak par oinsá aban bairua jestaun fronteira ne’e la’ós de’it parte Timor, em parseria ho Indonézia bele hadi’a di’ak liu par redús númeru pasajen ilegais,” tenik nia.

Alem de ne’e, ligadu ho koloka Falintil Forsa Defeza Timor-Leste (F-FDTL) iha freonteira, Xefe Governu relata, to’o oras ne’e, seidauk iha desizaun ruma, tanba prosesu diskusaun bá preparativus sira kontinua la’o hela.

Maibé, atu destaka forsa armadas iha fronteira mós hein desizaun ikus husi Prezidente Repúblika, Francisco Guterres ‘Lúolo’ hanesan kualidade komandante supreme forsa armadas nian.(ant)