Governu fo Oportunidade ba Seitor Privado Nacional ‘Kaer’ Projeto Bo’ot, Oscar Lima Agradese

Smnewstl.com 23-11-2021 (Dili) – Ministru Obras Públikas (MOP), Salvador Pires ho Prezidente Kámara Komérsiu Indústria Timor-Leste (CCI-TL), Oscar Lima asina Tersa-feira ne’e, akórdu kooperasaun bá seritifikasaun no inskrisaun empreza konstrusaun sivíl no mós empreza konsultoria téknika sivíl nune’e loke dalan ba seitór privadu nasionál atu bele partisipa mós iha projetu boot sira.

Ministru MOP, Salvador Pires hateten, iha artigu 7 husi dekretu-lei n°.27/2010 de 22 Dezembru, mak halo limitasaun bá seitór privadu bele konkore de’it projetu ho kustu orsamentu $ 7.5 milloens. Ho alterasaun ne’e loke ona dalan bá seitór privadu nasionál atu bele partisipa mós iha projetu boot sira.

“Dekretu-lei ida-ne’e mais importante liu ne’ebé signifikativu mak hasai tiha artigu 7 husi n°.27/2010 de 22 Dezembru, ne’ebé halo limitasaun dehan, seitór privadu bele konkore de’it $ 7.5 milloens, iha ne’ebá limitasaun ne’e ita hasai tiha, entaun bá oin sira bele konkore liu ida-ne’e,” dehan Ministru MOP, Salvador Pires, hafoin asina akórdu ho CCI-TL iha salaun Otél Timór, Dili, Tersa-feira ne’e.

Implementasaun husi dekretu-lei n°.17/2021 22 Setembru ne’ebé halo alterasaun dahuluk bá dekretu-lei n°.27/2010 22 Dezembru atu halo seritifikasaun no inskrisaun bá empreza lokál ne’ebé iha kapasidade finanseira, rekursu umanus no mós ekipamentu ne’ebé kompletu.

“Akórdu ne’e tama ho CCI-TL, tanba sira mak uma-mahon bá seitór privadu hotu iha Timor-Leste. Entaun sira hamutuk ho governu mak identifika sira-nia membru emprezariál sira hodi bele halo inskrisaun ida-ne’e,” dehan Salvador.

Governante ne’e esplika, alterasaun dekretu-lei ne’e, parte ida husi polítika oitavu governu konstitusionál nian kona-ba reforma lejislasaun nian.

Nune’e bele elimina sistama burokrasia liu-liu iha ambiente negósiu hodi tulun seitór privadu atu dezenvolve aan liután, tanba seitór privadu mak parseiru estratéjiku governu nian no mós hanesan observador bá planu dezenvolvimentu nasionál governu nian.

Sorin seluk, Prezidente CCI-TL, Oscar Lima hateten, agradese bá governu liu-liu Primeiru-Ministru, Taur Matan Ruak ho membru governu sira, tanba revoga ona dekretu-lei ne’e hodi fó konfiansa bá seitór privadu nasionál atu ka’er mós projetu liu milliaun $ 1.

“Dekretu-lei ne’ebé mak mosu mai atu halakon tiha fila-fali dekretu-lei n°.27/2010 ne’e, depois revoga tiha ona bá ita-nia dekretu-lei foun, kuandu revoga tiha ona hanesan ne’e bá ita di’ak, tanba uluk ne’e iha limitasoens ne’ebé kle’an tebes dehan katak, Timoroan labele ka’er projetu liu $ 1 milliaun dólares, agora laiha ona, Timoroan bele ka’er projetu to’o ne’ebé de’it desde ké nia iha kapasidade,” dehan Oscar Lima.

Prezidente CCI-TL ne’e esplika, bainhira emprezáriu Timoroan sira atu ka’er projetu boot liu milliaun $ 1 bá leten, tenki liu husi prosesu pra-kualifikasaun, bainhira kualifikadu tuir kapasidade A, B1 no B2 bele ka’er obra boot.

“Maibé, tenki-ser bá tuir pra-kualifikasaun par atu hetan ninia knaar atu bele hetan ninia direitu, pra-kualifikasaun ne’e par atu bele hatudu katak, nia kapasidade A boot liu, B1, B2 tuir depois mak C, ne’ebé mak laiha kapasidade finanseira laiha kapasidade tékniku nia sei hetan lai C depois mak sa’e bá B1, B2,”

Atu partisipa iha pra-kualifikasaun ne’e nia afirma, seitór privadu nasionál sira preparadu ona.(ant)