Governu Brazil kontinua Hametin Koperasaun Bilateral TL Iha Area Edukasaun

Smnewstl.com – Ministériu Edukasaun Timor-Leste liuhusi Sekretáriu Estadu Asuntu Ensinu Sekundáriu Jerál No Ensinu Sekundáriu Tékniku Vokasionál, Domingos Lopes Lemos hamutuk ho Prezidente INFORDEPE Sr. Domingos Martins, Diretór Jerál Ensinu Sekundáriu Deolindo Da Cruz ho ekipa delegasaun Timor-Leste akompaña husi Adidu Edukasaun Timor-Leste iha Brazil, reprezentante Embaxadór Timor-Leste Iha Brazil halo audiénsia ho Sekretaria Edukasaun Profisionál no Teknolojia Ministériu Edukasaun Brazil hodi hametin kooperasaun entre nasaun rua.

Sekretáriu Estadu Asuntu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos husu ba Guvernu Brazil liuhusi Ministériu Edukasaun iha Brazilia atu kontinua hametin kooperasaun bilaterál entre nasaun Timor-Leste no Brazil iha área formasaun ba profesór sira husi INFORDEPE hodi hasa’e kualidade edukasaun iha Ensinu Sekundáriu Tékniku Vokasionál.

” Programa prioridade ne’ebé iha ámbitu kooperasaun liuliu oinsá atu bele prepara kondisoens ba prezenza profesór Brazileiru sira iha Timor-Leste nune’e hodi organiza interkámbiu entre prefesór Timor-Leste no Brazil sira”, dehan Sekretáriu Estadu Asuntu Ensinu Sekundáriu Jerál No Ensinu Secundáriu Tékniku Vokasionál.

Governante Timor-Leste ne’e mós aprezenta ba Guvernu Brazil atu apoiu fundu ba preparasaun prátika ofisina husi komponente produtiva iha kursu Ensinu Sekundáriu Tékniku Vokasionál no mós atribuisaun bolsa estudu ba profesór no funsionáriu públiku sira hodi kontinua estudu akádemiku iha nasaun Brazil.

Entretantu, Sekretária Edukasaun Profisionál no Teknolojia Ministériu Edukasaun iha Brazilia, Sra. Izolda Cela, hato’o benvindu ba ekipa delegasaun husi Timor–Leste ne’ebé hala’o vizita servisu iha Brazil hodi hametin kooperasaun bilaterál entre nasaun rua.

“Guvernu Brazil apresia ho kooperasaun servisu ne’ebe dezenvolve ona durante tinan barak nia laran, hodi kontinua nafatin projetu Kooperasaun bilaterál hodi promove edukasaun ho kualidade no Edukasaun ba ema hotu Iha Timor-Leste”, afirma Sekretária Edukasaun Profisionál no Teknolojia Ministériu Edukasaun Brazilia.

Sekretária Edukasaun Profisionál no Teknolojia Ministériu Edukasaun Brazil nian Sra. Izolda Cela akrexenta katak, durante ne’e Kooperasaun entre nasaun rua iha área Edukasaun hetan rezultadu ne’ebé di’ak no kontinua hametin lasu parseria ida-ne’e hodi defini mekanizmu akompañamentu programa monitorizasaun no avaliasaun ba ezisténsia kooperasaun ba dezenvolvimentu setór Edukasaun iha Timor-Leste.

Hafoin remata, delegasaun Ministériu Edukasaun Timor-Leste kontinua audiénsia mós ho Conselho Nacional Instituiçoes Rede Federal Educação Prefessional, Científica e Tecnologica Brazil ( CONIF ), hodi deskute kona-ba oinsá atu dezenvolve formasaun profisionál no teknolojia, peskiza ho Inovasaun ba formasaun profesór sira iha INFORDEPE.

Antes remata delegasaun Timor-Leste ne’ebé xefia husi Sekretáriu Estadu Asuntu Ensinu Sekundáriu Jerál No Ensinu Sekundáriu Tékniku Vokasionál Sr. Domingos Lopes Lemos oferese tais ba Autoridade República Federál Brazil nu’udar simbolu kulturál Timor-Leste . [
(Smnews)