Governo Sei la Nonok ba Kompaña Abandona Projeitu, Sama Atensaun ba Kompañia Segerau

Smnewstl.com 16-11-2021 (Dili) – Ministru Obras Pùblikas (MOP), Salvador Eugénio Soares dos Reis Pires, fó ona orientasaun ba Diresaun Jerál Obras Pùblikas (DJOP) liuhosi Diresaun Nasionál Estrada, Ponte no Kontrolu i Seias (DNEPCC) atu sama atensaun bá kompañia Segerau Unipessoal Lda ne’ebé abandona hela projetu emerjénsia konstrusaun ponte perumnas-Ailok-Laran.

Tuir informasaun ne’ebé fó-sai husi pájina ofisiál MOP nian ne’ebé smnewstl.com asesu Tersa-feira ne’e komfirma, medidas ne’ebe sei foti maka orienta ba DNEPCC atu bolu dirijente kompañia Segerau Unipessoal Lda hodi sama atensaun.

Projetu ponte ki’ik iha Ailok-Laran ne’e projetu emerjénsia ne’ebé nia prosesu aprovizionamentu loke iha Ministériu Finansas (MF) liuhosi Komisaun Nasionál Aprovizionamentu (CNA) no aprovadu husi Konsellu Administrasaun Fundus Infraestrutura (KAFI) ho plafon orsamentu $24.000 resin, ho prosesu konstrusaun hahù husi fulan-Setembru to’o fulan-Dezembru tinan 2021.

MOP liuhosi DNEPCC sei ejiji responsabilidade kompañia nian hodi finaliza lalais projetu ne’e hodi fasilita movimentasaun transporte iha área refere.

Orsamentu rekonstrusaun estragus husi kalamidade (04-04-21) kolokadu iha fundus Infraestrutura no KAFI mak kontrola no administra nia prosesu tomak.

Entretantu, Tersa-feira semana kotuk (09-11-21) kompañia Segerau Unipessoal Lda, mobiliza ekipamentu pezadus hodi sobu ona manila ne’ebé, iha momentu ne’ebá liu husi orientasaun Ministru MOP bá kompañia Salimagu hodi tau manila, nune’e komunidade no transporte públiku sira bele utiliza provizóriu, hodi hein tenderizasaun bá konstrusaun ponte foun.

Tanba ponte ne’ebé lokaliza iha aldeia Moris bá Dame, Suku Bairru-Pite Postu Administrativu Dom Aleixo Munisípiu Dili ne’e, hetan estragus husi dezastre naturais ne’ebé akontese iha loron 4 fulan Abríl foin lalais ne’e.

Maibé, depois de kompañia Segerau Unipessoal Lda mai sobu tiha manila ne’e, to’o agora abandona tiha projetu ne’e no laiha ninia kontinuasaun, maske iha ona orden servisu husi Ministériu Finansas liu husi CNA atu ezekuta obra refere.

To’o informasaun ne’e fo sao parte kompaña responsavel seidauk aprezenta pozisaun.(*/ant)