Governo Rekuinese Laiha Kbi’it Realiza Eleisaun Presidensial ho Forma Elektroniku

Smnewstl.com 05-01-2022 (Dili) — Variante Covid-19 foun ho naran Omicrom ne’ebé nia transmisaun lais tebes husi ema bá ema, iha ne’ebé hahú ameasa mundo mundu inklui Timor-Leste rasik sai preokupasaun bo’ot.

Maske Timor Leste seidauk anunsia ba publiku rezista offisial Variante Omicrom, maibe ho publikasaun privado iha Media Social facebook husi Dotor Rui Maria de Araujo inklui eis Ministro Saude Nelson Martins rasik iha indisius mos ba Presidenti Republika, Francisco Guterres Lu-Olo atu tetu molok deside.

“Ita tauk aproveitamentu politiku sira iha situasaun sira hanesan ne’e hodi hases tia fali regras demokratiku ne’ebe estabelesidu. Mensagen husi Dotor Rui ho Dotor Nelson ne’ebe fo sai iha media social facebook ne’e, ita bele hare hanesan pra kondisaun ou konseitu ida ne’ebe husik hela ba publiku atu bele iha movimentu bo’ot entre fulan Feveereiro ho Marco nia laran, ne’e ladiak,”kestiona eis Komandante Brigada Negra ne’e.

Nia espera, enkontru Presidente Republika ho lider partido politiku asentu parlamentar labele sita sasan sira ne’e, maibe hanesan aman ba nasaun dala ruma mos bele tetu hotu informasaun sira.

Flarinando observa katak, Presidente Republika ladun iha vontade diak hodi responde ba festa demokrasia ne’e hare husi atrazu ba dekreta kalendariu eleisaun.

“Ita nafatin iha espeansa no hein katak, festa demokrasia nafatin lao tuir espetativa nune’e bele restaura fila fali situasaun politika nomos ekonomia rai laran,”nia espera

Kona ba eleisaun ho forma elektorniku ligado ho aneasas Variante Omicrom, Flarinando fundamenta, laiha garantia husi governo kona ba kestaun ne’e.

“Governo seidauk deklara katak, bele ou labele eleisaun ho forma elektroniku, tamba ne’e susar wainhira iha aproveitamentu politiku ruma maka situasaun sira hanesan mensiona mos bele akontese,”nia tenik tan.

Akademista Flarinando Coimbra komfirma, Presidente Republika deside ona atu rona opiniaun husi Partido Politiku sira hahu Kinta-feira aban no Sexta-feira molok dekreta kalendario eleisaun, maibe mos ho publikasaun sira husi Mediku Senior, Rui Maria de Araujo ho Nelson Martins bele mos sai sasukat ligado ho aneasas husi virus ne’e rasik.

Hatan kona ba Eleisaun ho Forma Elektroniku, Ministru Administrasaun Estatal (MAE), Miguel Perreira de Carvalho rekuinese laiha kondisaun duni, maibé konsellu ministru aprova ona dekretu ezekusaun governu kona-ba medidas prevensaun Covid-19 iha sentru votasaun ho estasaun votu sira.

“Eleisaun online laiha, governu foin mak aprova dekretu governu sira ne’ebé regulamenta kona-ba ezekusaun eleisaun prezidensiál nian, ida mak medidas sira-ne’ebé mak sei foti iha estasoens de votus ho sentru votasaun par husu ita-nia eleitór sira kumpre regras distansiamentu sosiál, utiliza máskara,” informa Ministru MAE, Miguel Perreira de Carvalho iha Palásiu Governu, kuarta ohin.

Sekretariadu Tékniku Administrasaun Eleitorál (STAE) hahú moliza ekipamentu lojístika bá prevensaun Covid-19 nian bá sentru votasaun sira nu’udar medidas prevensaun bá eleitores sira husi virus SARS-CoV-2 ho variante Omicrom.

“STAE hanesan órgaun ezekutador bá aktus eleitorál bá eleisaun prezidensiál nian, husi regulamentu sira-ne’ebé ha’u temi, sei ajuda para medidas sira-ne’ebé prevene ita-nia populasaun sira infetadu husi virus ne’e bele prevenidu,” dehan nia.

Entretantu, iha reuniaun Konsellu Ministru, aprova ona dekretu ezekusaun kona-ba medidas prevensaun husi virus SARS-CoV-2 no variante Omicrom bá sidadaun sira iha ámbitu eleisaun prezidensiál, atu nune’e sidadaun sira lebele infetadu bá vírus SARS-CoV-2 ne’e.(ant)