Governo Komfirma Númeru Populasaun Simu Vasina Ki’ik Liu Mak Ermera

Smnewstl.com (Dili) — Primeiru-Ministru (PM), Taur Matan Ruak hateten, númeru populasaun sira ne’ebé simu vasina kontra Covid-19 ki’ik mak munisípiu Ermera tanba foin Alatinze 12%.

Xefe Governu enkoraja populasaun Ermera atu partisipa iha kampaña nasionál vasinasaun, hodi bele simu vasina atu kombate vírus Covid-19 iha munisípiu Ermera.

“Saida mak governu husu no ha’u pessoalmente husu bá ita-nia inan-aman sira ké tenki partisipa iha kampaña vasinasaun, tanba Ermera ikus liu munisípiu ida hetan vasina ki’ik liu mak Ermera, nia 12% de’it, hanesan Vikeke ne’e segundu lugar tuir Dili, entaun ha’u enkoraja sira par dalan di’ak ita atu kombate moras ne’e mak simu vasina,” informa PM Taur, hafoin remata enkontru semanál ho Prezidente Repúblika, Francisco Guterres Lú-olo, kinta (05/08/21) iha Palásiu Prezidensiál Aitarak-laran, Dili.

Nia hatutan, aimoruk vasina sei sufisiente hela atu fó bá sidadaun sira, tanba ne’e husu sira atu simu vasina.

Nune’e nia apela bá Ermera oan sira atu hakat bá sentru saúde hodi simu vasina, tanba governu hasai ona regras, ema ne’ebé simu ona vasina dalarua sei halo lívre iha territóriu nasionál.

“Ita sei iha vasina sufisiente par fo bá ita-nia sidadaun sira, tanba ne’e mak ha’u enkoraja sira par simu vasina. Sé ita-boot sira haree medidas ne’ebé mak governu hasai, ema ne’ebé simu ona vasina dalarua nia lívre, hanesan ne’e mós piór liután ho variante ida agora Delta ne’e ita preukupa loos, ne’e iha tiha ona viziñu Indonézia ona, ita mós iha ona, entaun ita preukupa loos,” tenik PM Taur.

Maske nune’e Xefe Ezekutivu ne’e reafirma tan katak, implemetasaun serka sanitária no konfinamentu obrigatóriu iha munisípiu ne’e nu’udar dalan ida atu evita surtu Covid-19 labele hada’et tan bá munisípiu seluk.

Maibé governu kontinua fó apoiu ai-han nesesidade báziku bá komunidade sira iha postu administrativu Ermera ho Railaku ne’ebé hetan konfinamentu obrigatóriu, nune’e sidadaun sira labele enfrenta hamlaha.

“Serka sanitária bá Ermera ne’e dalan ida par ita halo nusa evita atu moras da’et fali bá munisípiu sira seluk, maibé ita hatene katak, populasaun Ermera ne’e depende liu bá kafé, tanba ne’e governu mós tau hela matan bá ida-ne’e tuir posibilidade ne’ebé ita iha konserteza ita tenki tau atensaun bá ita-nia populasaun sira,” nia dehan tan.(ant)