Governo Klarifika ba Publiku Razaun Suspende Hikas Atividade Escolar

Smnewstl.com (Dili) — Ministériu Edukasaun Juventude no Desportu (MEJD), hasai ona diploma ministerial hodi suspende fila-fali ensinu prejensiál iha eskola sira hahú husi loron 17 to’o loron 31 fulan Agostu tinan 2021, tanba variante Delta fó ameasa makas bá labarik sira.

Ministru Prezidénsia Konsellu Ministru, Fidélis Manuel Leite Magalhães konfirma, professór sira simu ona vasina dalarua, enkuandu labarik minor idade sira seidauk vasina, nune’e iha rísku makas atu infetadu bá variante Delta.

“Kona-ba professór ho vasina ne’e iha vertente rua, ida bá professór sira ida bá estudante, kona-ba professór sira, sira bele protejidu tanba iha ona vasina rua, maibé la signifika estudante sira-ne’e agora protejidu ona, tanba ho variante ida ne’ebé mak fó ameasa boot liu bá labarik sira ne’ebé idade ki’ik ne’ebé seidauk hetan vasina,” dehan Ministru Fidélis Magalhães, kuarta (18/08/21) iha Palásiu Governu.

Ne’eduni, liu husi diploma ministeriál ne’e, suspende fali ensinu prejensiál eskola sira iha munisípiu.

“Tanba ne’e mak desizaun ne’ebé hatur husi ministériu edukasaun ne’e liu husi diploma ne’ebé mak ministériu fó, por enkuantu hapara lai ensinu prejensiál sira iha munisípiu,” subliña nia.

Governante ne’e afirma, ezekutivu deside hapara provizóriu eskola, tanba governu la garante labarik sira atu kumpre saúde hanesan uza máskara, fase liman no seluk tan ne’ebé Ministériu Saúde no organizasaun mundiál saúde fó sai ona.

“Iha fatin hotu-hotu difisil atu hetan opsaun ida ne’ebé mak 100%, tanba ne’e mak ita dehan, ita atividade seluk ne’ebé mak la’o, bainhira inan-aman hamutuk ho oan sira, atu impoin máskara, fase liman bá labarik sira,”

“Maibé iha eskola bainhira labarik sira agrega, momentu ida-ne’e sei difísil atu iha serteza katak, labarik sira implementa regra sira saúde nian, tanba ne’e mak governu liu husi konsellu ministru husu bá ministériu edukasaun hamutuk ho saúde par atu halo duni inspesaun bá eskola sira katak, iha duni ona kondisoens atu reforsa implementasaun medidas sira distansiamentu no medidas sira kona-ba uma máskara no medidas sira-ne’ebé mak rekomenda husi organizasaun mundiál saúde,” subliña nia.

Ne’eduni, bainhira labarik sira halibur hamutuk iha eskola, maka sei iha tendénsia boot bá rísku elevadu bá vírus SARS-CoV-2 no variante Delta atu hada’et lalais liu

Nune’e mós, Ministra Saúde, Odete Maria Freitas Belo, husu bá ema hotu atu iha konsiénsia hodi respeita regra sira saúde nian, nune’e bele hotu lalais korrente transmisaun Covid-19 hodi la afeta bá ensinu aprendijajen eskola.

“Ita hotu tenki konsiente, atividade sira-ne’ebé mak bele aglomera ema sé karik ita bele miniza ema, ha’u hanoin dehan, vírus ne’e sei la espalla, atu nune’e ita bele fó importánsia liu bá eskola, tanba sira halimar de’it iha uma, sira la eskola, sira la hetan vasina,” dehan Ministra Saúde.

Odete Belo hatutan, bá sira-ne’ebé mak simu ona vasina, maibé la kumpre protokolu saúde nian, maka sei fó rísku boot liu bá labarik ki’ik sira iha uma.(ant)