Governo Foin Atu Diskuti Subsidiu Front Line ba Jornalista, Husu Atu Pasensia

Smnewstl.com 08-11-2021 (Dili) – Ministériu Prezidénsia Konsellu Ministru, ajenda ona proposta lei husi Ministériu Assuntu Parlamentar no Komunikasaun Sosiál (MAPKOMS) atu halo diskusaun iha reuniaun Konsellu Ministru Kuarta-Feira ne’e kona-ba atribuisaun subsídiu liña frente bá jornalista sira.

Ministru MAPKOMS, Francisco Jerónimo informa, proposta tama ona iha Konsellu Ministru atu halo diskusaun, tan ne’e husu jornalista sira atu kalma no labele ansi.

“Semana oin (Kuarta-Feira) agora imi-nia lei ne’e ha’u lori bá konsellu ministru atu diskuti, uluk ha’u dehan beibeik bá ita-boot sira katak, labele ansi, tanba prosesu ne’e la’ós fásil, maibé iha ha’u-nia fuan ne’e ita-boot sira-nia ejizensia ha’u sempre hakarak atu halo esforsu nafatin,” dehan MAPKOMS, Francisco Jerónimo, bainhira remata enkontru ho PM Taur iha Rezidénsia Farol, Dili, Segunda ne’e.

Subsídiu liña frente bá jornalista sira, tanba jornalista sira presta ona servisu iha ámbitu prevensaun no mitigasaun surtu Covid-19 iha Timor-Leste liu husi informasaun.

“To’o ona finál semana kotuk ajenda ona bá Kuarta agora atu halo diskusaun kona-ba lei ida-ne’e, depois hotu tiha sei haruka bá Prezidente Repúblika, ha’u fi’ar katak, konsellu ministru sei aprova, maibé lori bá Prezidente Repúblika mak ita haree,” dehan nia.

MAPKOMS finaliza ona lista naran jornalista sira-nian ne’ebé submete husi média sira, no hein de’it, bainhira Konsellu Ministru aprova ona lei, no Xefe Estadu promulga ona, maka sei halo pagamentu

To’o oras ne’e, pagamentu subsidio ba front line halo ona ba autoridade seguransa PNTL no seluk tan.(ant)