Governo Deside Taka Provisorio Escola Iha Kapital Dili Husi, 17 To’o 31 Agosto 2021

SMNewstl.com (Dili)– Governo liu husi Ministerio Edukasaun Juventude e do Desporto hasai ona despaico hodi taka provisorio Escola iha Kapital Dili, komesa husi loron, 17 to’o 31 Agostu 2021.

Desizaun governo ho numeru, 42/G-MEJD/IIV/2021 ligado ho numeru pozitivo ba Kovid-19, ne’ebe rezista aumenta makas.

Tuir informasaun ne’ebe SMNews asesu konfirma katak, total kazu ne’ebe rezista ba loron ohin nian (17-08-2021) hamutuk 247. Husi numeru ne’e, kapital Dili rezista a’as tebes ho total kazu hamutuk 192.

Bazeia ba numeru governo deside taka provisorio nune’e fo espasu ba autoridade kompotente servisu ba kombate propagasaun Kovid-19.

“Posibilidade virus ne’e sirkula makas ona iha ita nia rai, labarik barak maka infetado ona no husu deit auto Kuarantina. Ne’e duni ita la hatene, tamba iha Ermera rasik kuaze labarik ki’ik barak infetado. To’o oras ne’e seidauk iha vasina ba labarik sira. Ita espera desizaun ne’e diak hodi fo espasu ba autoridade kompotente halao nia servisu,”informa Dirigente Saude ida ne’ebe lakoi atu mensiona naran.

Dirigente ne’e nafatin husu ba sidadaun sira hotu atu nafatin kumpri ba Protocolo Saude nian nune’e kontribui ba prooagasaun virus refere. (Rio)