Governo konklui pagamentu cesta Basica ho Montante Millaun $ 63,5

Smnewstl.com 10-09-2021 (Dili) – Ministériu Finansas to’o iha loron 9 fulan setembru tinan 2021, konklui ona pagamentu Cesta Básica ho montante millaun $63,5 ba kompaña fornesedór hamutuk 188 ne’ebé mak estabelese ona kontratu ho Ministériu Implementadór sira.

Tuir komunikadu imprensa ne’ebé smnewstl.com sesta ohin, husi Ministériu Finansas konfirma, pagamentu hirak ne’e realiza hafoin Sekretariadu Tékniku Fundu Covid-19.

Ministériu Finansas simu pedidu pagamentu husi Ministériu Turizmu, Komérsiu no Indústria hamutuk millaun $29,5 ba kompaña lokál 72, Sekretáriu Estadu Kooperativa ho valór millaun $20,2 ba kompaña 24, Sentru Lojístika Nasionál ho valór millaun $8,4 ba kompaña 61 no Ministériu Agrikultura no Peskas ho valór millaun $5,2 ba kompaña lokál hamutuk 31.

Kompaña fornesedór hirak ne’e mós kumpre ona sira nia devér hodi selu impostu rendimentu 0,5% husi sira nia totál pagamentu ba Autoridade Tributária, Ministériu Finansas ho totál kontribuisaun impostu hamutuk $317,5 mil.

Inisiativa kompaña lokál kumpre sira nia devér ne’e, fó mós kontribuisaun ba iha taxa ezekusaun Governu liuliu iha parte ezekusaun reseitas doméstika ne’ebé to’o iha 31 agostu 2021, atinji ona millaun $96,6 ka 52% husi totál estimativa reseitas millaun $187,1.

Bazeia ba relatóriu husi Ministériu Koordenadór Asuntu Ekonómiku, to’o iha fulan agostu 2021, benefisíariu sira ne’ebé mak simu ona Cesta Básica hamutuk ema millaun ida rihun-atus-haat resin, ka 98% husi totál benefisíariu hamutuk ema millaun ida rihun-atus-lima.

Bá oin, distribuisaun Cesta Básica ba reklamante rihun 25 resin iha territóriu nasionál sei la’o tuir kalendáriu ne’ebé mak trasa ona husi Ministériu Koordenadór Asuntu Ekonómiku hamutuk ho Ministériu Implementadór sira.

Ministériu Finansas hakarak atu akresenta katak molok realiza pagamentu, kompaña sira tenke nafatin kumpre sira nia devér hodi selu sira nia impostu rendimentu 0,5% husi sira nia totál rendimentu konforme Lei Tributária haruka.

Kompaña sira tenke aprezenta resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu.

Karik kompaña fornesedór sira iha pergunta ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál AT www.attl.gov.tl atu hetan informasaun kona-ba pagamentu impostu, submisaun relatóriu mensál/anuál no pedidu emisaun ba Sertidaun Dívidas.

Pagamentu impostu mós bele halo liuhusi mákina ATM P24 no kontribuinte sira la-presiza ba forma tan iha banku komersiál sira hanesan uluk.(ant)