Funsionáriu Públiku 8,700 Resin Hahú Teste Promosaun Bá Vaga 878

Smnewstl.com 15-10-2021 (Dili) – Komisaun Funsaun Públika (KFP) realiza bá teste promosaun ho forma online bá funsionáriu públiku 10% husi totál kandidatu hamutuk 8,700 resin iha rai laran no mós rai li’ur ne’ebé kompete bá vaga hamutuk 878.

Prezidente KFP, Faustino Cardoso hateten, teste ne’e KFP halo regularmente bá funsináriu públiku sira, tan ne’e teste refere hala’o bá dala tolu ona, no teste primeiru hala’o ona iha tinan 2019, 2020 no tinan 2021, nune’e bele promove sira-nia karreira iha funsaun públika.

Faustino Cardoso hatutan, teste online ne’e, hala’o mós bá funsionáriu tékniku sira-ne’ebé Ministériu Negósiu Estranjeiru no Kooperasaun (MNEK) destaka bá hala’o missaun diplomátika iha embaixada Timor-Leste nian hamutuk 19 no sidade 24 iha li’ur.

“Bá tinan ida-ne’e iha kandidatu elijíivel bá teste promosaun ne’e hamutuk ho 8,700 resin atu kompete bá vaga hamutuk 878, ne’e 10% husi totál kandidatus 8,700 itál ne’e. Imazina 8 mill atu hadau seluk promosaun bá vaga hamutuk 878. Iha mós ona teste promosaun online hodi hatán bá diplomata sira, funsionáriu tékniku sira destakadu iha missaun diplomata iha mundu tomak, iha embaixada sira hamutuk 19, iha sidade hamutuk 24 iha mundu tomak,” informa Prezidente KFP, Faustino Cardoso, hafoin remata enkontru ho Prmeiru-Ministru, Taur Matan Ruak iha rezidénsia Farol, Dili. Segunda ne’e.

Faustino Cardoso esplika, teste ne’ebé atu halo promosaun bá vaga 878 ne’e, tuir grau ida-idak nian, tan ne’e, bainhira hetan valor di’ak, sei hetan promosaun gra hahú husi G hodi promove bá gau A.

Tan ne’e, Prezidente KFP ne’e afirna, prosesu teste bá kandidatura 8,700 resin bá vaga 878 ne’e, transparánsia no iha kredibilidade, tanba KFP aplika modelu teste real time, tan ne’e, binhira teste hotu, kandidatu sira rona kedas rezultadu.

“Bá vaga 878 ne’e vaga promosaun tuir grau ida-idak ninian, husi grau B bá A, husi C bá B, husi D bá C, husi E bá D, husi F bá E husi G bá F. Ne’ebé husi númeru vagas ne’e, ida-idak iha 10% bá promosaun ninian. Rezultadu teste promosaun ne’e real time, katak hotu ho hotu iha sala teste sai ninia rezultadu bele haree kedas iha fatin, C ho pontuasaun to’o iha ne’ebé, ida-idak bele hatene kedas, ne’e mak transparánsia, ne’e mak kredibilidade,” subliñ nia.

Alem de ne’e, Faustino Cardoso realsa, matéria ne’ebé uza hodi fó teste bá funsionáriu públiku sira-ne’e mak kona-ba koñesimentu jerál, liu-liu hanesan sobre servisu administrasaun públika nian, finansas, aprovizionamentu, IT, relasaun públika no komunikasaun no sira seluk tan.

Maski ne’e, nia akresenta tan katak, teste online bá funsionáriu tékniku sira iha li’ur ne’e sai hanesan pilotu, tan ne’e, bainhria hatudu rezultadu di’ak, maka sei implementa mós bá iha munisípiu, nune’e evita funsionáriu sira iha munisípiu tenki gasta tempu no osan hodi mai tuir teste iha nasionál.

“Teste online ne’e inovativa foun hahú tinan ida-ne’e, tanba fokus bá diplomata sira, ne’e sei sai pilotu par aban bairua bele aplika mós bá iha munisípiu sira, kuandu kondisaun permite ona, kandidatus bá promosaun la presiza atu mai to’o Dili, maibé husi munisípiu sira iha ona oportunidade atu bele tuir promosaun hodi bele dezenvolve sira-nia karreira iha funsaun públika,” tenik nia.

Entretantu, tuir oráriu, kada loron kandidatu hamutuk 300 mak tuir teste ne’ebé koloka bá turnu tolu, iha turnu ida iha kandidatu 100, teste refere hahú tuku 9 dader remata iha 6:30, hahú iha loron 18 fulan outurbu to’o loron 2 fulan Dezembru tinan 2021.

Oras ne’e dadauk, KFP rejista ona totál funsionáriu públiku no ajente administrasaun públika iha territóriu laran tomak hamutuk 35,525, husi númeru ne’e la inklui funsionáriu kazuál sira.(ant)