FPR Deklara Apoiu Kandidatu PR Ne’ebé Indijita Husi Xanana Gusmão

Smnewstl.com 23-10-2021 (Dili) – Maske Kay Rala Xanana Gusmao atual Presidente Partido CNRT anunsia ona ba publiku seidauk hola pozisaun apoio kandidatu ruma ba Presidente Republika iha elisaun 2022, maibe sidadaun ne’ebe hamahan a’an iha Frente Politiku Rezervada (FPR) hahu hola ona sira nia pozisaun hodi lakoi nasaun kontinua moris iha inserteza.

Tuir FPR, kualker kandidatu ne’ebe maka eskolha husi Kay Rala Xanana Gusmao sei hetan apoio total husi sira tamba hakarak hadia ona rai ida ne’e.

Koordenadór Jerál FRP, Mateus Brito Ximenes hateten, desde harii estadu direitu demokrátiku, no konsolidasaun demokrasia, FRP observa katak, hahú husi primeiru governu to’o oitavu governu konstitusionál, iha ona impasse polítika ekonómika.

Nune’e mós, aumenta tan ho pandemia Covid-19 no dezastre naturais iha 4 Abríl liu bá, lori povu moris iha polítika ida komplexu, ejijente no kontraditóriu, tanba ne’e hodi fó impaktu negativu bá povu nia moris.

“Tanba situasaun sira-ne’e hotu, desde iha konjuntura anteriór mai to’o ohin loron hamosu situasaun ida ké ejijente kontraditóriu tebes iha ita-nia rain, liu-liu mosu buat ne’ebé mak impasse polítiku, ekonómiku, nune’e mós dezastre naturais ho pandemia Covid-19, tanba ne’e mak halo ita-nia povu no sosiedade ida-ne’e desnorteado atu bá loos ne’ebé,” dehan Koordenadór Jerál FRP, Mateus Brito Ximenes, iha komferénsia imprensa ne’ebé hala’o iha Bidau Lecidere, Dili, sábdu ne’e.

Tan ne’e, FRP sei fó apoiu bá kandidatu ida-ne’ebé mak de’it mak karik hetan fi’ar husi Líder Karismátiku Kay Rala Xanana Gusmão, hodi kandidata iha eleisaun prezidensiál tinan 2022.

Tanba liu husi espíritu kalor Líder Karismátiku Kay Rala Xanana Gusmão nian atu bele fó fali esperansa bá povu nia moris.

“Tanba ne’e mak liu husi Maun Boot Kay Rala Xanana Gusmão ho nia espíritu kalor umanu hodi tun fila-fali bá sosiedade hodi fó fali inspirasaun foun bá iha povu no sosiedade ida-ne’e oinsá par hakat liu husi situasaun ne’ebé pasa,” afirma Mateus.

Nia hatutan, FRP hanesan movimentu polítiku ida ne’ebé reprezenta kamada polítiku hotu-hotu iha territóriu nasionál iha faze konstrusaun nasaun no dezenvolvimentu nasionál.

Nia fundamenta, FPR mos hanesan observador ne’ebe observa prosesu dezenvolvimentu nasional tomak, desde Timor-Leste restaura ninia independénsia iha tinan 2002 to’o agora.

To’o oras ne’e kandidatu ne’ebe hahu harame ona media social facebook mak hanesan Amo Martinho Gusmao, Antonio Benevides, Armanda Berta dos Santos, Presidente KHUNTO inklui seluk maske seidauk iha anunsio offisial.(ant)