FONGTIL Husu PM Taur Suspende Armanda Berta Husi Kargu Vise PM no MSSI

Smnewstl.com — Diretór Ezekutivu FONGTIL, Daniel Santos do Carmo husu ba Primeiru-Ministru (PM), Taur Matan Ruak, atu suspende Armanda Berta dos Santos husi nia kargu nu’udar Vise Primeiru Ministro no Ministru Solidariedade Sosiál no Inkluzaun (MSSI).

Ezecutivo ne’e fundamenta, Armanda Berta dos Santos viola lei eleisaun prezidensiál númeru 7/2006, 28 Dezembru, iha artigu 7 ne’ebé ko’alia kona-ba inelejibilidade (la elijível). Tanba sei ativu hela iha nia funsaun servisu hanesan Vise PM no MSSI, maibé, deklara ona bá públiku nia kandidatura bá Prezidente Repúblika periódu tinan 2022-2027.

“Relasiona ho Armanda Berta ne’ebé sira-nia partidu deklara ona bá públiku katak, nia kandidata aan bá Prezidente Repúblika 2022-2027, maibé, ita-nia kestaun ne’e mak ita husu Primeiru-Ministru loloos tenki suspende, tanba nia halo ona deklarasaun bá públiku, ne’e ho rajaun ne’e baze bá lei númeru 7/2006, 28 Dezembru, iha artigu 7 lei eleitorál bá Prezidente Repúblika,” dehan Diretór Daniel do Carmo, sesta (16/07)21) iha FONGTIL kaikoli, Dili.

Nune’e mós iha artigu 7 lei númeru 7/2006, 28 Dezembru, kona-ba lei eleisaun prezidensiál, mós bandu ema ne’ebé hala’o hela servisu estadu nian atu kandidatu aan bá Prezidente Repúblika mak hanesan.

Majistradu judisiál no ministériu públiku, diplomata sira iha karreira no funsaun servisu, funsionáriu públiku, membru polísia no F-FDTL, membru governu no kualkér relijiaun no kultu, no mós membru Komisaun Nasionál Eleisoens (CNE).

“Entaun Armanda Berta agora asume hela kargu vise PM i MSSI, signifika sira-nia deklarasaun ne’e aprezenta nia kandidata ne’e sira kontra artigu 7 alíñea 6,” dehan Daniel.

Sosiedade sivil preukupa, deklarasaun ofisiál Armanda Berta nian ne’e, sei perturba servisu Armanda Berta nian hanesan Vise PM no MSSI, no mós bele utiliza rekursu estadu nian hodi halo kampaña bá nia kandidatura liu husi servisu ne’ebé MSSI governante ne’e halo.

“Pur-ezemplu nia bá terenu bá halo servisu ruma, ema bele haree ona katak, nia mak kandidatu bá Prezidente Repúblika, ne’e hanesan utiliza rekursu estadu bá ninia kandidatura. Aat liu mak CNE seidauk aprezenta kalendáriu eleisaun prezidensiál bá PR, no na’i PR seidauk dekreta data bá eleisaun prezidensiál, nia deklara tiha ona, ne’e komete irregulariedade ne’ebé hakerek iha ita-nia lei eleitorál bá eleisaun prezidensiál,” kestiona Daniel.

Tanba ne’e, sosiedade sivil ne’e husu PM Taur atu uza kompeténsia nu’udar Xefe Governu, atu suspende tiha Armanda Berta husi kargu, nune’e nia bele fokus bá hala’o atividade kampaña hodi prepara bá eleisaun prezidensiál tinan 2022-2027. (Ant)