FONGTIL ‘Du’un’ MP Mak Trava Prosesu Kazu Ró Haksolok

Smnewstl.com (09-12-21) (Dili) — Fórum ONG Timor-Leste (FONGTIL) ‘du’un’ Ministériu Públiku (MP) mak trava prosesu kazu Ró Haksolok hodi la fó delegasaun kompeténsia bá Komisaun Anti Korrupsaun (KAK) atu loke investigasaun.

Diretór FONGTIL, Daniel Santos do Carmo hateten, komemorasaun loron mundiál Anti Korrupsaun ne’e atu fó biban bá Timor-Leste hodi halo reflexaun katak, to’o ona iha ne’ebé estadu nia papel atu kombate korrupsaun.

Tan ne’e, komemorasaun loron mundiál Anti Korrupsaun iha Timor-Leste, Daniel afirma, FONGTIL kestiona komitmentu estadu nian, liu-liu autór judisiáriu sira-nia seriedade atu kombate korrupsaun iha Timor-Leste.

“Ró Haksolok ne’ebé gasta tiha ona $ 14 milloens iha 2016, maibé agora ninia paradeiru inserteza, maske relatóriu husi Tribunál Kontas relata, maibé Ministériu Públiku ka Prokuradór Jerál Repúblika seidauk agresivu seidauk halo asaun ruma ka fó kompeténsia bá KAK hanesan Polísia espesializada atu loke investigasaun ruma bá situasuan ró Haksolok nian,” dehan Diretór FONGTIL, Daniel Santos do Carmo, iha komferénsia imprensa hodi komemora loron mundiál Anti Korrupsaun, iha Kaikoli, Dili, Kinta-feira ne’e.

Daniel hatutan, la’ós KAK mak laiha seriedade atu kombate korrupsaun, tanba KAK nu’udar Polísia espesializada, ne’ebé atu loke investigasaun bá kazu ruma presiza hela delegasaun kompeténsia husi Ministériu Públiku ho PJR.

“Iha assuntu ida-ne’e ita la’ós haree dehan, KAK laiha seriedade, KAK hanesan Polísia espesializada, no KAK bele iha seriedade, bainhira Ministériu Públiku ho Prokuradór agresivu fó kompeténsia, tanba ita-nia dalan boot atu hetan justisa iha ita-nia rain mak Ministériu Públiku ho Prokuradór Jerál Repúblika,” dehan Daniel.

Daniel hatutan, desde harii instituisaun KAK iha 2010 to’o 2021, kada tinan estadu aloka osan liu husi Orsamentu Jerál Estadu (OJE) hamutuk milliaun $ 1.3 to’o milliaun $ 1.5, no durante tinan 11 ne’e, estadu investe ona osan hamutuk milliaun $ 15.

Maibé, to’o oras ne’e, FONGTIL seidauk haree, rezultadu husi investimentu ne’ebé estadu investe bá KAK liu husi rekursu finanseira.

Sorin seluk, Komisáriu KAK, Sérgio Hornai hateten, prosesu investigasaun bá ró haksolok dadauk ne’e la’o hela, tan ne’e KAK labele ultrapassa uluk servisu balun ne’ebé karik sei iha hela Tribunál Kámara Kontas nia kompeténsia.

“Prosesu ida-ne’e sei la’o, prosesu ita tau ketak, mais ita halo konektividade transprtasaun husi rai bá rai ida tenki la’o nafatin, prosesu labele rai, no fim ida-ne’e rai hodi impede fali movimentu sidadaun sira-nian husi Ataúro mai Dili, Oe-cusse mai Dili. Prosesu a parte, responsabilidade kriminál sé mak halo aban bairua nia responsabiliza,” dehan Komisáriu Sérgio Hornai.

Komisáriu KAK ne’e esplika, iha aktus bá jestaun públika estadu nian liu husi Orsamentu Jerál Estadu (OJE) bá situasuan ró Haksolok, tan ne’e, iha ona auditoria susesiva husi Tribunál Kontas mak sei haree kona-ba difinisaun orsamentu tuir duni nia finalidade nune’e, labele kontradisaun entre prosesu investigasaun kriminál ho aktus administrativus.

Enkuanto ba akuzasaun FONGTIL nian ne’e rasik parte Ministerio Publiku seidauk aprezenta pozisaun. (ant)