FONGTIL Aprezenta Ona Keixa Kaptura Membro Governo 7 ho Delegasaun

Smnewstl.com 21-10-2021 (Dili) – Organizasaun Naun Govermental FONGTIL liderado Daniel do Carmo ofisiamente aprezenta ona keixa ba Komisaun Anti Korupsaun (KAK) ligado ho partisipasaun Timor Leste iha Expo Dubai ne’ebe Xefia husi membro governo nain 7, ho total delegasaun hamutuk ema nain 120 (atus ida rua nulu).

Diretor FONGTIL, Daniel do Carmo fundamenta, razaun aprezenta keixa tamba konsiderado delegasaun ne’ebe xefia husi membro governo nain 7 fo prezuizo ba estado.

“Ohin formalmente ita mai aprezenta keixa ba KAK hanesan policia espesial ba kombate korupsaun bazeia ba kodiku penal prosesu Timor Leste,”dehan Daniel hafoin aprezenta Keixa ne’ebe simu direitamente husi Komisario KAK, Sergio Hornai, iha Farol Dili, Kinta-feira ne’e.

Executivo ne’e justifika razaun husi keixa bazeia ba kodiku prosesu penal Timor Leste artigo 213 ho 214, ne’ebe klaramente fo dalan atu ema ou koletiva ruma sente prezuizo.

Nia hatutan, komisaun anti korupsaun sei halo estudo ba dadus nomos informasaun hotu ne’ebe hato’o tuir organograma ou lei KAK nian hafoin foti desizaun.

Daniel fundamenta, FONGTIL mos propoin ba KAK atu kaptura mos membru governo 7 ho delegasaun.

“Kapturasaun la signifika lori kedas ba Tribunal ou Kadeia, maibe prosesa tuir padraun legal ne’ebe ejiste iha lei Komisaun Anti Korupsaun bazeia ba evidensia ne’ebe aprezenta priense duni kriteira ou lae, ne’e ami la to’o iha neba. Maibe hakarak afirma iha ne’e katak, FONGTIL asume responsabilidade tomak ba keixa ne’ebe hato’o,”dehan nia.

Komisario Anti Korupsaun (KAK), Sergio Hornai hafoin simu tia dokumentu FONGTIL nian afirma, hanesan orgaun polisia kriminal tuir kodiku prosesu penal ne’ebe ejiste, wainhira iha keixa KAK iha obrigasaun simu no regista inklui fo kontinuidade ba prosesu ne’e rasik.

Maske nune’e, Komisario KAK ne’e dehan, antes to’o iha prosesu presiza halo analiza ida klean, halo nia sekuensia sira nomos marsa prosesual bazeia ba lei haruka.

Kona ba kapturasaun ba membro governo 7 ho delegasaun 120, Hornai deklara, razaun hotu ne’ebe aprezenta fila fali ba natureza kazu.

“Kuando priense rekezitus tuir lei hateten, autoridade kompotente bele ezerse sira nia funsaun, bele detein tamba bazeia ba faktus, maibe depende ba nia sirkustansia sira,”tenik Hornai.

Enkuanto membro governo 7 ne’ebe partisipa iha Expo Dubai mak hanesan Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK),  José Agostinho da Silva, Ministru Turizmu (MT), José Lucas do Carmo da Silva, Ministru Petróleu no Minerais, Victor da Conceição Soares, Ministru Agrikultura no Peskas, Pedro dos Reis, Vise-Ministru Turizmu, Komérsiu no Indústria, Domingos Lopes Antunes no Vise-Ministru Negósiu Estranjeiru no Kooperasaun (MNEK), Julião da Silva.

Tuir informasaun delegesaun fila ona mai Timor Leste, Kinta-feira ne’e, (21-10-2021) (Ant)