Fidelis : Rezignasaun Embaixadór Blacktstone La Fó Impaktu Bá Relasaun Bilaterál EUA ho TL

Smnewstl.com (Dili) — Ministru Prezidénsia Konsellu Ministru, Fidélis Magalhães afirma, ho rejignasaun Embaixadór Estadu Unidus Amérika (EUA) iha Timor-Leste, Michael Kevin Blacktstone nian, se la fó impaktu bá relasaun bilaterál entre rai rua.

Tanba tuir Ministru Fidélis Magalhães, Embaixadór EUA, Kevin Blacktstone rejigna-aan husi kargu nu’udar Embaixadór EUA iha Timor-Leste, tanba rajaun pessoál.

“Rejigna-aan ne’e tanba rajaun pessoál señór Embaixadór nian, iha fatin hotu-hotu kuandu nasaun sira relasaun aat ne’e Embaixadór sira la rejigna, sira recall de’it, recall ne’e katak, bolu fila bá fali sira-nia rain, tanba ema refere labele ninia estatutu hanesan embaixadór,” dehan Ministru Fidélis Magalhães, kuarta (04/08/21) hafoin remata enkontru konsellu ministru iha Palásiu Governu.

Fidélis hatutan, kuandu diplomata husi nasaun ida iha relasaun la di’ak ho nasaun ne’ebé nia destaka bá, maka ninia nasaun rasik espulsa ka dada fila-fali nian.

Tanba nia subliña, rejignasaun diplomata ida nian la’ós prátika normál, tanba ne’e reflete bá kondisaun no relasaun diplomátika entre nasaun.

“Entaun iha kazu ida-ne’e kuandu embaixadór rejigna-aan, tanba motivu ou rajaun pessoál. Sé nasaun ida-ne’ebé simu maka lakoi atu nasaun ida seluk iha ninia represntasaun diplomátika iha rai laran, nia espulsa katak, nia haruka fila-fali embaixadór fila-fali bá iha ninia rain, maibé la’ós iha kazu ida-ne’e,” dehan nia.

Oitavu governu konstitusionál lideradu, Taur Matan Ruak, apresia ho servisu ne’ebé Embaixadór Kevin Blacktstone halo durante ne’e, tanba maske tempu badak de’it, maibé konsege halo buat ruma bá povu Timor-Leste.

“Ne’ebé ho ida-ne’e, ita hakarak atu fó sai hanoin ita la presiza komenta, maibé ita-nia apresia katak, ita-nia kolega Embaixadór Blacktstone ne’ebé halo ninia knár iha ita-nia rain enfelizmente iha tempu badak, maibé nia konsege halo buat barak, maibé tanba motivu pessoál mak tenki husi hela ita-nia rain,” apresia Governante ne’e.

Nune’e Governante ne’e fi’ar katak, bá futuru Embaixadór EUA foun ne’ebé sei troka Kevin Blacktstone ne’e, kontinua mantein enerjia, nune’e bele hametin liután relasaun bilaterál entre Timor-Leste ho EUA.

Antes ne’e, Embaixadór EUA iha Timor-Leste, Michael Kevin Blacktstone, deside rejigna-aan husi Embaixadór iha Timor-Leste, tanba iha substánsia pessoál urjente, tanba ne’e sei fila bá EUA iha fulan-augustu ne’e nia laran.(ant)