Familia Ida Mout Iha Tasi Binagua Laga, Ema Nain 5 Lakon Vida

Smnewstl.com 02-01-2022 (Baucau) – Novidades triste mai husi povu Aldeia Lakula, Suco Gurusa, Postu Admistrativo Kelikai, Municipio Baucau basa lakon familia uma laran ne’ebe kompostu husi bin alin feto 2 no alin mane ida inklui primu ho prima bainhira mout iha tasi Binagua, Postu Administrativo Laga, Municipio Baucau.

Foto vitima nain 5 ne’ebe mout iha Tasi Binagua Laga, 02-12-2022. Foto Facebook

Tuir kronologia ne’ebe Smnews asesu husi familia komfirma, akontesementu ne’e akontese maizumenus tuku 9 dadersan bainhira familia refere husi Gariwai ba festeza selebrasaun tinan foun iha Tasi Binagua Laga.

Matebean feto nain 3 ne’ebe mout iha tasi Binagua, Laga, Domingo, 02-01-2022. Foto Espesial Facebook

Darlya Gaio familia husi matebean sira informa, sira nain 5 ne’ebe lakon vida mesak uma laran iha ne’ebe  nain tolu nudar feton ho nan rasik kompostu feto rua ho mane nain ida, enkuanto 2 seluk hanesan prima ho primu.

Tuir nia, familia refere husi Gariawai mak ba festeza tinan foun 2022 iha Tasi Binagua Laga. Nia haktuir, hanesan bai-bain haris hela tasi no iha tuku ida meudia mak akontese situasaun ne’ebe la espera ne’e.

“Sira haris hela tasi fo kotuk, derepenti deit laloran bo’ot baku no lori sira tama ba tasi laran hodi rezulta sira mout. Sira mout iha tuku ida meudia, peskador husi Binagua Laga mak ajuda buka nune’e konsege hetan fali sira nain 4 iha tuku 3 ho balun lokoraik, no nain ida iha tuku 6 lokoraik ho kondisaun maioria labele salva ona vida,”haktuir nia.

Nia hatutan, nudar familia ne’ebe maske la partisipa direita mos iha atividade festeza tinan foun hodi rezulta situasaun ne’ebe la espera, maibe hanesan familia sente lakon tebes. Nia infoma, dadaun ne’e matebean sira iha ona Aldeia  Lakulela, Suco Gurusa, Postu Administrativo Kelikai, Municipio Baucau.

Total sira ne’ebe mout hamutuk nain 6, iha ne’ebe nain 5 lakon vida kompostu feto 3, mane 2, enkuanto mane nain ida mak konsege salva, maibe hetan hela tratamentu iha hela Hospital Lanud Baucau tamba ho kondisaun grave.

To’o informasaun ne’e fo sai parte autoridade seguransa seidauk aprezenta pozisaun ruma. (Rio)