Falur Rate Laek Alerta ba Soldadu F-FDTL Foun 598 Servisu Ho Profisionál no Neutralidade

Smnewstl.com 31-01-2022 (Dili) — Soldadu FALINTIL Forsa Defeza Timor-Leste (F-FDTL) foun hamutuk na’in 598 termina ona formasaun no treinu durante fulan 6 no juramentu bá Bandeira nasionál.

Kadetes F-FDTL foun sira-ne’e tama iha akademia militár iha loron 27 fulan Setembru 2021 hamutuk na’in 600, maibé formasaun no treinamentu la’o, na’in 2 mak deside rejigna aan, tanba la auguenta ho treinamentu, enkuantu ida seluk kestaun saúde.

Xefe Estadu Maiór Jenerál F-FDTL Interinu, Major Jenerál Falur Rate Laek, husu bá kandidatu foun sira atu servisu ho profisionál ho neutralidade, nune’e bele serví povu ho nasaun.

“Rekrutadu sira-ne’e iha ha’u-nia diskursu ha’u hatete, disiplina, abnegasaun, profisonalizmu, neutralidade ida-ne’e importante, valór sira-ne’ebé instituisaun siénsias milirares hanorin ne’e agora tenki aplika ida-ne’e iha prátika,” dehan Major Jenerál Falur Rate Laek, hafoin remata serimónia graduasaun bá soldadu foun sira iha sentru no treinu Metinaro, segunda ne’e.

Falur Rate Laek hatutan, komandu entrega ona bá Estadu Maiór konjuntu atu koloka membru foun sira-ne’e bá iha komponente hanesan naval, terrestre, aereo no seluk tan.

“Planu ne’e parte téknika, Estadu Maiór konjuntu mak sei haree par distribuisaun ne’e prioridade komponente naval, komponente terrestre, komponente aereo, enjiñaria forsa apoiu servisu,” tenik nia.

Sorin seluk, Ministru Defeza, Brigadeiru Jenerál Reformadu Filomeno Paixão hateten, prioridade boot bá oitavu governu konstitusionál mak tenki halo investimentu bá iha kondisaun infraestrutura no meius atu bele fasilita membru sira hala’o servisu ho di’ak.

“Konsekuéntemente ita tenki halo investimentu bá iha ekipamentu bá farda, infraestrutura bá uma, bá kama no meius ne’ebé nesessáriu ne’ebé soldadu bele avontade no konfortabilidade,” dehan Ministru Defeza, Filomeno Paixão.

Governante ne’e dehan, halo rekrutamentu primeiru 600 ne’ebé daduak ne’e halo ona graduasaun no juramentu, tan ne’e, planu iha tinan ida-ne’e sei halo tan rekrutamentu bá soldadu 600, no mós iha 2023 mós sei halo tan rekrutamentu, nune’e atinji númeru 3.600 tuir tárjetu ne’ebé iha.

Ministru Defeza, Brigadeiru Jenerál Reformadu, Filomeno Paixão fi’ar katak, soldadu 598 ne’e, bele reforsa tan seguransa hodi asegura páz, no asegura soberania Timor-Leste, nune’e povu bele moris hakmatek hodi bele hala’o atividade atu hadi’a moris.

Parte seluk, Xefe Estadu Maiór Jenerál Forsas Armandas, Tenente Jenerál reformadu Lere Anan Timur dezafia soldadu foun sira atu labele haluha liafuan ne’ebé ohin halo juramentu liu-liu, bainhira iha situasuan nesessáriu, sei fó vida tomak hodi defende nasaun no povu.

Tenente Jenerál Reformadu Lere Anan Timur hatutan, úniku termu refere, uza de’it bá iha instituisaun F-FDTL, tanba hakerek ona iha Regulamentu Disiplina Militár (RDM) iha númeru 1.

“Imi sira-ne’ebé ohin halo juramentu, liafuan ida-ne’ebé imi labele haluha kuandu nesessáriu ha’u fó ha’u-nia vida bá ha’u-nia nasaun, no ida-ne’e labele haluha, úniku iha Timor-Leste só foraa armada mak uza termu ida-ne’e,”

“Molok imi atu halo juramentu, imi-nia ofisiais lee normas RDM (Regulamentu Disiplina Militár), dalaruma Portugés imi ladún komprende, mais ohin númeru 1 dehan katak, kuandu nesessáriu fó o nia vida, signfika katak, nasaun ninia vida boot liu o nia vida, entaun o tenki fó o nia vida bá o nia nasaun bá o nia povu,” dehan Tenente Jenerál reformadu Lere.

Jenerál Reformadu ne’e mós ejize bá soldadu foun sira atu mantein disiplina no responsabilidade nu’udar soldadu, tanba ne’e, tenki halo tuir de’it regras Militár nian.

Nia subliña, loron ikus ona mak hamrik iha Militár sira-nia oin ho uniforme sivíl iha serimónia graduasaun ne’e.

Maibé, jurídikamente loron 2 fulan Fevereiru 2022, iha serimónia aniversáriu transformasaun FALINTIL bá F-FDTL, sei hatais farda no fitun tolu atu entrega responsabilidade bá Xefe Estadu Maiór Jenerál Forsas foun, Falur Rate Laek.(ant)