Smnewstl.com 14-11-21 (Dili) – Tribunál Distrital Dili (TDD) liu husi desizaun primeiru interrogatóriu aplika medida koasaun prizaun preventiva arguidu na’in-rua ne’ebé kompostu husi funsionáriu Ministériu Obras Públikas (MOP) ho inisiál SS no ida sidadaun estranjeiru ho inisiál R.
Arguidu SS no R Tribunál aplika prizaun preventiva, tanba iha indísius forte bá arguidu na’in-rua komete krime gráve, falsifikasaun dokumentu no falsifikasaun asinatura.
Enkuantu arguidu na’in 2 seluk ho inisiál UPS husi Indonézia no AB ema Timor ne’e, Tribunál aplika medida koasaun aprezentasaun periodika no proibisaun auzénsia, nune’e atu aprezenta a’an kada semana dala ida bá postu Polísia ne’ebé besik.
No prende mós arguidu sira-nia pasaporte, atu nune’e asegura arguidu sira-nia prezensa durante prosesu investigasaun.
Entretantu, Ministériu Públiku promove arguidu sira bá krime korupsaun hanesan passiva no ativa, brankamentu kapital, asosiasaun kriminoza, burla agravadu, no falsifikasaun dokumentu ne’ebe previstu iha artigu 292, 313, 188, 267, 303 hotu-hotu iha kódiku penal Timor-Leste.
Tanba ne’e Advogadu Privadu, Fernando da Costa ne’ebe fo asistensia ba arguidu SS no R, la aseita ho medida koasaun ne’ebe Tribunal aplika ba nia kliente, tanba krime ne’ebé Ministériu Públiku imputa ba nia kliente seidauk ezekuta no foin mak inisia.
Nia hatutan, sei iha prazu loron 15 parte defeza atu halo rekursu bá Tribunál Rekursu kontra desizaun refere, maibé, depende bá parte família arguidu sira-nian.
“Medidas koasaun ne’ebé tribunál aplika mai ha’u-nia kliente, prizaun preventiva, S no R. Ha’u só apenas atende de’it ida inisiál S, ha’u-nia kliente so ida-ne’e de’it, hanesan defeza iha parte ida defeza la aseita, porque ida-ne’e, ita bele dehan katak, loloos krime ida-ne’ebé Ministériu Públiku promove par akuza sira-ne’e seidauk aplika krime ida-ne’e, loloos ne’e foin inisia mais seidauk ezekuta, maibé, prontu tribunál konsidera katak, ne’e nia indísiu ne’ebé forte duni ona hodi nune’e tribunál deside aplika medidas koasaun prizaun preventiva bá ha’u-nia kliente,” dehan Advogadu Privadu, Fernando da Costa, iha TDD, Dili, domingu ne’e.
Sorin seluk, Advogadu Privadu, Miguel Acácio Faria, aseita ho medida koasaun ne’ebé Tribunál aplika ba nia kliente arguidu UPS ho AB ne’e adekuadu duni.
“Medida koasaun ne’ebé Tribunál aplika bá ha’u-nia kliente, bá ha’u haree katak, adekuadu duni, tanba haree bá prosesu ne’e boot no prosesu ne’e involvimentu ema boot balun, ho ema grupu balun ne’ebé involvimentu iha ne’ebá, ida-ne’e medida koasaun ne’ebé tribunál aplika adekuadu, tanba ha’u-nia kliente ne’e sidadaun estranjeiru,” dehan Advogadu Privadu, Miguel Faria.
Antes iha loron Tersa-feira loron 9 fulan ne’e PSIK ezekuta mandadu detensaun buska no apreensaun husi TDD ho nu. Nuc 00/21.PGGCC bá sidadaun na’in 4 iha kapitál Dili no detein arguidu nain 3 de’it durante oras 72 nia laran.
Primeiru interrogatóriu ne’e prezidi husi Juíz Singulár, Evangelino Belo, Ministériu Públiku reprezenta husi Prokuradór, Rogêrio Viegas no arguidu sira hetan asistensia legal husi advogadu privadu Miguel Faria, Octavio, Fernando da Costa no Adelaide Trindade.(ant)
Komentariu