Falintil-FDTL Ofisialmente Simu Membru Foun 600, Lere la Tolera Grupo Artermarsiais Iha Institituisaun

Smnewstl.com 27-09-2021 (Dili) – Membru foun FALINTIL Forsa Defeza Timor-Leste (F-FDTL) hamutuk na’in 600 hahú ohin bá oin, sai ona membru iha instituisaun refere.

Iha Segunda-feira ohin, membru foun 600 F-FDTL tama ona iha akademia iha komponente formasaun hodi tuir formasaun durante fulan tolu iha sentru instrusaun iha Metinaro.

Xefe Estadu Maiór Jenerál F-FDTL, Tenente Jenerál Lere Anan Timur hateten, iha membru arte marsiais balun mós pasa iha prosesu rekrutamentu, tanba sira ho onestidade deklara aan katak, involve duni iha arte marsiais hanesan, PSHT, KORKA, KERA SAKTI no seluk tan.

Maibé Lere Anan Timur husu, foun sira katak, hahú ohin bá oin, laiha tan grupu arte marsiais iha instituisaun F-FDTL laran, tanba tama forsa armadas atu serví povu no nasaun la’ós atu serví fali grupu ida.

“Apartir ohin bá oin, imi membru F-FDTL ninian, laiha SH laiha artes marsiais iha forsa nia laran, imi uluk mai tuir teste imi deklara imi-nia aan, tanba kritériu ida mak dehan katak, tenki sinseru laran mós leal, sé o arte marsiais korka ninan dehan ha’u korka nina, SH dehan SH ninian, imi deklarai imi-nia aan hotu i hakerek hela iha surat rai hela iha repartisaun pessoál ne’ebá,” dehan Tenente Jenerál Lere Anan Timur, iha Fatuhada. Segunda ohin.

Lere hatutan, tempu badak mós, membru foun na’in 600 ne’e, sira-ne’ebé involve aan iha arte marsiais ruma, sei entrega hotu atributu hanesa farda arte marsiais nian bá instituisaun, no mós sei halo juramentu bá bandeira nasionál, nune’e bele sai loloos efetivu F-FDTL nian.

“Juramentu bá bandeira liafuan ida-ne’ebé lulik todan imi tenki kumpre, liafuan ida imi labele haluha mak ida-ne’e, ha’u prontu fó ha’u-nia vida bá ha’u-nia nasaun bá ha’u-nia rain. Ne’e úniku imi prontu, mais imi sei lori fulan tolu ou fulan ha’at atu tama bá juramentu ida-ne’e,” afirma Lere.

Aleiende ne’e, Tenente Jenerál ne’e mós husu bá membru F-FDTL na’in 600 ne’e, ati hatudu lealdade tomak bá komandu, no halo tuir de’it orden komandu nian, nune’e evita situasaun hanesan iha krize 2006.

Lider Masimu Falintil FDTL ne’e husu mos bá jerasaun patriota sira-ne’ebé mak liu rekrutamentu rejime espesiál hamutuk na’in 300 ne’e, atu hatudu ezemplu di’ak bá forsas armadas.

“Ha’u husu bá imi atu leal nafatin, laran moos nafatin bá imi-nia komandu mak ami na’in tolu, ha’u nu’udar Xefe Estadu Maiór Jenerál, Vise Xefe Estadu Jenerál no Xefe Estadu Maiór Jenerál, imi tenki leal, tenki laran moos. Tanba ne’e mak imi kuaze 200-resin ga 300 bolu imi dehan, jerasaun patriota rekrutamentu espesiál imi iha responsabilidade boot imi mak tenki sai banati sai ezemplu bá forsas armadas tomak, labele repete tan krize 2006,” afirma nia.

Lere Anan Timur mós agradese bá inan-aman sira, tanba bele ofrese ona sira-nia oan ne’ebé sira hadomi bá instituisaun F-FDTL, atu serví povu ho nasaun.

Tanba tuir nia katak, prosesu rekrutamentu atu inkorpora bá F-FDTL ne’e la fasíl hanesan ho rekrutamentu iha administrasaun públika nian, tanba sai militár profisaun ida todan tebes.

Entretantu, membru F-FDTL 600 ne’e ohin tama ona iha sentru instrusaun Metinaro ne’e kompostu husi feto hamutuk na’in 62, mane na’in 538. Husi númeru ne’e, jerasaun patriota hamutuk na’in 300.(ant)