F-FDTL-TNI Diskuti Kooperasaun Bilaterál Iha Área Importante 5

Smnewstl.com 08-10-2021 (Dili) – Xefe Estadu Maiór Jenerál Forsa Armanda, Brigadeiru Jenerál Calisto dos Santos ‘Coliati’ reprezenta Komandu FALINTIL Forsa Defeza Timor-Leste (F-FDTL) halo enkontru bilaterál ho angkatan darat Tentara Nasionál Indonézia (TNI) iha área importante lima liu husi zoom.

Xefe Estadu Maiór Forsa Armanda, Brigadeiru Jenerál Calisto dos Santos ‘Coliati’ hateten, objetivu husi enkontru bilaterál entre F-FDTL ho TNI angkatan darat ne’e, atu ko’alia kona-ba kooperasaun iha área defeza entre nasaun rua ne’e.

“Área sira-ne’ebé atu diskuti liu-liu primeiru ko’alia kona-ba rekursus umanus husi parte Indonézia ninian hanesan ita-nia parseiru bele ajuda ita hodi halo formasaun iha área barak, hanesan iha área infantaria ninian, ne’ebé sei prepara ita-nia ofisiais angkatan darat Timor-Leste ninian, sei mós bá halo formasaun Indonézia. Nune’e mós iha área kavalaria, kavalaria ne’e la’ós hanesan uluk ita-nia avo sira sa’e kuda, kavalaria ida agora ne’e defende ita-nia governu,” dehan Brigadeiru Jenerál Calisto dos Santos ‘Coliati’ iha kuartel jenerál Fatuhada, Dili. Sesta ohin.

Coliati hatutan, iha área artillaria nian, sei kontinua nafatin servisu hamutuk ho TNI atu forma militár Timor-Leste nian iha área refere, tanba durante ne’e Timor-Leste hetan apoiu husi TNI hodi fó apoiu bá artillaria neen Timor-Leste iha Metinaro.

Iha parte seluk, enkontru bilaterál ne’e mós, parte rua ko’alia kona-ba área saúde entre TNI ho F-FDTL, oinsá TNI, nune’e bele kontribui bá área saúde militár nian, la’ós de’it partisipa iha rai laran, maibé partisipa mós iha rejiaun Ázia ne’e.

“Depois tuir fali iha área saúde ninian, iha área saúde tanba militár partisipa la’ós de’it iha rai laran, maibé Timor-Leste mós partisipa iha rejiaun ida-ne’e, oinsá mak Timor-Leste bele kontribui iha área saúde, presiza ita tenki halo preparativus, tanba preparativus ne’e mak iha ita-nia parseiru husi Indonézia prontu atu apoiu ita,” tenik nia.

Ikus liu, parte rua mós ko’alia kona-ba oinsá atu servisu hamutuk hodi garante seguransa no estabilidade entre angkatan darat ho forsa terrestre F-FDTL nian iha liña fronterizu.(ant)