F-FDTL Pelotaun Rua ba Treinamentu Iha Austrália Kona-ba Manutensaun Ró

Smnewstl.com 29-10-2021 (Dili) – Falintil Forsa Defeza Timor-Leste (F-FDTL), haruka ona membru komponente naval Hera pelotaun rua hamutuk ema na’in 60 bá tuir treinamentu kona-ba operasaun no manutensaun ró iha Austrália.

Xefe Estadu Maiór Jeneral F-FDTL, Brigadeiru Jenerál Calisto dos Santos ‘Coliati’ hato’o lia hirak ne’e, bainhira hala’o enkontru bilsterál ho Embaixadór Austrália iha Timor-Leste, Petter Roberts, no Adidu Militár Austrália iha kuartel jenerál F-FDTL Fatuhada, Dili, sesta ne’e.

Brigadeiru Jenerál Calisto dos Santos ‘Coliati’ hateten, desde inísiu iha tinan 2019, bainhira governu Austrália promete atu fó rua patrullamentu rua bá F-FDTL, maka komponente Naval prepara ona militár na’in 60 hodi ba tuir treinamentu iha Austrália no mós iha Hera atu opera no halo manutensaun bá ró.

“Hahú 2019 ita prepara ona militár husi parte naval pelotaun rua ema na’in 60 ne’ebé oras ne’e bá simu treinamentu iha Austrália, no mós simu treinamentu iha Hera, treinu oinsá mak atu bele opera ró sira-ne’e kuandu entrega ró sira-ne’e mai Timor-Leste. Iha ne’ebá tékniku hanesan eletrisidade ninian, kona-ba mákina ró ninian, kona-ba komunikasoens, kona-ba eletrónika buat ne’ebé iha ró laran ne’e iha espesialidade ida-idak nian,” informa Brigadeiru Jenerál Coliati.

Brigadeiru Jenerál ne’e mós hein katak, governu Austrália bele kumpre sira-nia promesa ne’ebé hato’o ona katak, ró patrullamentu rua ne’e sei entrega bá governu Timor-Leste iha fulan jullu tinan 2023 tuir akórdu ne’ebé mak estabelese ona.

“Ami ko’alia ho Austrália atu ami sor-sorin tenki ka’er metin bá iha ami-nia komitmentu katak, jullu 2023 ró rua ne’ebé promete atu entrega bele entrega iha tempu ida-ne’ebé determinadu tiha ona, atu nune’e Falintil-FDTL bele iha kapasidade atu bele fó garantia bá ita-nia tasi no liu-liu atu fó garantia bá ita-nia riku-soi ne’ebé iha tasi,” dehan Brigadeiru Jenerál Coliati.

Sorin seluk, Embaixadór Austrália iha Timor-Leste, Petter Roberts konfirma, governu Austrália promete ona atu oferese ró rua bá F-FDTL iha tinan 2023, tanba Austrália iha kooperasaun servisu iha área seguransa marítima nian.

“Austrália oferese ró rua bá F-FDTL, ró rua bá F-FDTL ne’e deside iha tinan 2017, ne’e presiza prepara didi’ak, Austrália la’ós fornese de’it, bainhira Austrália fornese ekipamentu hanesan ró ne’e mós tenki inklui mós treinamentu, no mós diskuti kona-bá oinsá bele mantein, bainhira fonrese ró rua bá Timor-Leste mós fornese programa manutensaun, ne’e importante duni tanba presiza uza,” dehan nia.(ant)