Evita Ró La Soke Malu, Governu Aprova Ratifikasaun Adezaun TL Bá Kovensaun Internasionál

Smnewstl.com 11-11-2021 (Dili) – Governu liu husi reuniaun konsellu ministru aprova projetu proposta rezolusaun Parlamentu Nasionál (PN) kona-ba ratifikasaun adezaun Timor-Leste bá konvensaun sobre regulamentu internasionál hodi evita ró-ahi labele soke malu iha tasi laran husi tinan 1973.

Projetu proposta rezolusaun ne’e aprezenta husi Ministru Transporte Komunikasaun (MTK), José Agostinho da Silva, iha reuniaun konsellu ministru Kinta-feira ne’e.

Ministru Prezidénsia Konsellu Ministru, Fidélis Magalhães esplika proposta ne’ebe hetan aprovasaun sei haruka bá PN hodi ratifika.

“Konsellu Ministru ohin aprova proposta rezolusaun Parlamentu kona-ba ratifikasau adezaun Timor-Leste bá konvensaun kona-ba regulamentu internasionál hodi evita atu ró-ahi labele soke malu,” dehan Ministru Fidélis Magalhães hafoin remata enkontru konsellu ministru iha Palásiu Governu.

Porta-voz Governu ne’e esplika, konvensaun ne’e elabora ho objetivu atu garante seguransa navegasaun no mós sei estabelese regulamentu navegasaun, nune’e ró-ahi sira tenki kumpre hodi labele soke malu iha tasi laran.

“Konvensaun ida-ne’e importante, tanba nia regula regra sira kona-ba ró. Hanesan rekizitus kona-ba uza ahi oan (lampu), distánsia entre ró sira, sinais sira, forma kondusaun ró sira, ne’ebé ita bele dehan, ne’e hanesan regra tránzitu estrada nian mak ita sei aplika iha tasi,” esplika Fidélis.

Alem de ne’e, konvensaun ne’e mós sei garante seguransa ne’ebé di’ak liu iha tasi laran, bainhira empreza sira halo atividade operasaun ró iha tasi laran.(ant)