Euclides Belo Husu Diretor FONGTIL Labele Baralla Situasaun Ho Kilat Ilegál

Smnewstl.com 08-09-2021 (Dili) — Komandante Unidade Patrullamentu Fronteira (UPF), Superintendente Euclides Belo husu Diretór FONGTIL, Daniel Santos do Carmo atu labele baralla situasaun ho kilat illegal hodi hatauk komunidade sira ne’ebé mak hela besik iha fronteira Timor-Leste ho Indonézia.

Euclides Belo lamenta ho deklarasaun Diretór FONGTIL ne’ebé fó sai iha media balun katak, ekipa konjunta ne’ebé fó seguransa iha liña fronteira laiha kapasidade, tanba ne’e kilat illegal bele hakat liu iha fronteira.

Tanba ne’e, Superintendente Euclides Belo husu Diretór FONGTIL, Daniel Santos do Carmo, atu labele hatama kanuru tohar bá assun seguransa nian, maibé atu haree de’it bá servisu organizasaun sosiedade sivíl nian.

“Tanba ne’e mak husu bá kolega sira iha NGO FONGTIL labele baralla situasaun par bele implika bá ita-nia komunidade sira-ne’ebé mak hela iha fronteira, labele tau kanuru bá assuntu seguransa nian, tanba ne’e mak ha’u husu par knár saida mak ita halo ne’e halo mak ita-nian, labele tau kanuru bá assuntu seguransa nian, sé ita Timoroan tenki fó informasaun pozitivu labele fó ida atu baralla fali situasaun,” dehan Komandante UPF, Euclides Belo, iha Komandu Jerál PNTL, kuarta ohin.

Superintendente Euclides Belo afirma, kilat manu ne’ebé tama iha mai Timor-Leste, Komandu Polísia Munisípiu Covalima konsege prende ona.

Nia hatutan, kilat manu hirak ne’e tiru ema la mate, tanba armas refere la’ós hanesan armas ne’ebé mak Polísia Nasionál Timor-Leste (PNTL) ho FALINTIL Forsa defeza Timor-Leste (F-FDTL) uza.

“Kilat manu ne’e sé mak hakarak atu koko ha’u bele koko bá nia, ou sé mak hakarak atu utiliza bele koko bá ha’u, ha’u pronto, mais labele barilla situasaun, kilat manu ne’e manu nian, la’ós kilat automátiku hanesan AR15 ga AK33 ne’ebé mak ami ka’er la’e. Atu hatete katak, kilat manu mak ita prende tiha ona iha Suai agora prosesu ona, kilat manu,” afirma nia.

Alem de ne’e, Komandante UPF ne’e mós husu Diretór FONGTIL, atu tetu didi’ak assuntu sira molok halo intervensaun iha media, nune’e populasaun ne’ebé hela iha fronteira labele pániku ho informasaun ne’ebé FONGTIL fó sai.

“Tanba ne’e mak husu bá Diretór ONG FONGTIL sfatt sira la’e, teeki hadi’a ninia intervensaun iha media sosiál, tanba ami iha liña fronteira ne’e garante bá komunidade lubuk liu-liu husi Sakato to’o Citrana, nune’e mós husi Motaain to’o Mota-masin, par komunidade sira labele sente traumátiku ho informasaun ne’ebé mak Diretór ko’alia,” sujere Euclides.

Euclides rekoñese, iha tinan 10 liu bá, UPF prende ona kilat manu lubuk ida, maibé armas hirak ne’e, PNTL halo ona destroisaun iha Metinaru.(ajo)