EUA Sei Fornese Edukasaun Militár Bá F-FDTL

Smnewstl.com 11-11-2021 (Dili) – Estadus Unidus Amérika (EUA) komprometidu sei fornese edukasaun militár bá Falintil Forsa Defeza Timor-Leste (F-FDTL).

Kinta-feira ne’e, Asistente Adjunta Ministru Defeza EUA bá Ázia Súl no Sudeste Aziátiku, Lindsey W.Ford hasoru malu ona ho Ministru Defeza, Filomeno Paixão no mós Xefe Estadu Maiór Jenerál F-FDTL, Tenente Jenerál Lere Anan Timur, akompañadu husi Majór Jenerál Falur Rate Laek iha Fatuhada Dili.

Hafoin remata enkontru, Asistente Adjunta Ministru Defeza EUA bá Ázia Súl no Sudeste Aziátiku, Lindsey W.Ford hateten, sorumutu ne’e, ko’alia kona-ba reforsa kooperasaun bilaterál iha assuntu militár nian, no mós ko’alia kona-ba reabilitasaun aeroportu Baucau.

“Hasoru malu ne’e, ami ko’alia kona-ba oinsá reforsa kooperasaun bilaterál iha assuntu militár li-liu posibilidade fornese edukasaun militár bá forsas F-FDTL inklui interkámbiu bá ita-boot sira-nia forsas,” informa Lindsey W.Ford.

Sorin seluk, Xefe Estadu Maiór Jenerál F-FDTL, Tenente Jenerál Lere Anan Timur, agradese bá EUA ne’ebé sempre iha korajen nafatin atu fó apoiu bá F-FDTL liu-liu iha área formasaun rekursu umanus.

“Ida-ne’e ha’u agradese bá nia, tanba sira-nia apoiu bá ita-nia formasaun rekursu umanus, no sira promete katak, prontu atu forma nafatin ita nia ema,” dehan Lere.

Apoiu ne’ebé EUA fó bá Timor-Leste durante ne’e la’ós Timor mak izmola, maibé, ne’e nu’udar dever no obrigasaun nasaun dezenvolvidu hanesan EUA no seluk tan atu fó bá nasaun ki’ik ne’ebé foin ukun-an.

“Depois ko’alia kona-ba apoiu sira-ne’ebé ita presiza, hanoin katak, ita presiza apoiu, la signifika katak, ita husu izmola, dever obrigasaun paizes potentes, paizes dezenvolvidu tenki tau matan bá paíz sira em dezenvolvimentu,” afirma Lere.

Xefe Estadu Maiór Jenerál F-FDTL ne’e mós agradese bá apoiu tomak ne’ebé durante ne’e EUA fó ona bá Timor-Leste, liu-liu bá instituisaun F-FDTL.

Lindsey W. Ford mos fornese dadauk ekipamentu protesaun pesoál adisionál husi Forsa Aérea Pasífiku Estadus Unidus nian ba Timor-Leste hodi ajuda hakotu pandemia ne’e, mitigasaun ba ema no sosiedade sira, no hametin rekuperasaun.

“Apoio ne’e inklui fundu millaun $2.3 husi Komandu Indo-Pasífiku Estadus Unidus no Ajensia Estadus Unidus ba Dezenvolvimentu Internasionál (USAID) atu harii fasilidade izolamentu iha Baucau, harii unidade kuidadu móvel iha Dili, no hadiak fornesimentu be’e no saneamentu iha sentru kuarentena iha Batugade,”.

Estadus Unidus halao ona ezersísiu militár anuál dala tolu ho F-FDTL no haruka mo’os membru F-FDTL barak ba iha Estadus Unidus hodi halao estudu lian Inglés no formasaun profisionál militár nian.

Aleinde ne ‘e, Estadus Unidus Amérika nia Navál Seabees harii no reabilita ona klínika no eskola liu 100 iha Timor-Leste hodi ajuda harii futuru ida ne’ebé di’ak liu ba Timoroan sira. Projetu sira ne’e ho valór liu millaun $50 durante tinan 10 nia laran.(ant)