Estudantes Iha Papel Importante ba Rezolusaun Konflitu Komunutaria ho Dalan Mediasaun

Smnewstl.com 11-10-2021 (Dili) – Ministériu Interiór liu husi Diresaun Nasionál Prevensaun Konflitu Komunitáriu (DNPKK) hamutuk ho parseiru UN WOMEN, sensibiliza Segunda-feira ohin, matadalan mediasaun sensível bá jéneru bá estudante universitáriu sira.

Objetivu husi sensibilizasaun ne’e mak eleva liután estudante universitáriu sira-nia koñesimentu oinsá atu halo intervensaun bá konflitu komunitária ho dalan mediasaun ne’ebé sensível bá jéneru.

Diretór DNPKK, António Viegas informa, sensibilizasaun matadalan no mediasaun sensível bá jéneru ne’e importante tebes bá estudante sira, tanba sira mak sai hanesan autór bá dezenvolvimentu nasionál no iha sosiedade.

“Sensibilizasaun bá loron ohin ne’e importante bá estudante sira, primeiru sira mak sai hanesan autór oinsá par lori dezenvolvimentu bá sosiedade. Saida mak tenki hatene husi ne’e, entaun ami mós aprezenta matadalan husi ami-nian atu hato’o bá sira par sira komprende didi’ak oinsá sira bele sai referénsia oinsá atu dezenvolve tan de’it,” dehan Diretór DNPKK, António Viegas, iha salaun Luz Clarita, Dilii. Segunda ohin.

Matadalan sensível bá jéneru ne’e mós hetan ona aprovasaun husi Primeiru-Ministru no Ministru Interiór, Taur Matan Ruak, tanba ne’e utiliza hodi bele introdús bá estudante universitáriu no mós komunidade sira atu bele hateten.

“Ami-nia matadalan ne’e importante, tanba ne’e gratuita atu fó atendimentu liu-liu bá sira kbiit la’ek sira, no mós sira-ne’ebé mak laiha posibilidade atu lori sira-nia kazu ne’e bá oin, kuandu sira kopera ho ami oinsá par atu rezolve sira-nia problema rasik,” dehan nia.

Fatin hanesan, Analista Programa Feto Páz no Seguransa UN WOMEN, Leonesia Tekla da Silva reforsa, UN WOMEN halo parseria ho governu Timor-Leste, Ministériu Interiór no Sekretáriu Estadu Protesaun Sivíl no DNPKK tinan 10 ona.

Reprezentante UN WOMEN hatutan, matadalan mediasaun sensível bá jéneru bá estudante sira, tanba estudante universitáriu sira nia papel importante tebes hanesan akademísta, nune’e sira bele iha kbiit atu fasilita líderes komunitáriu sira rezolve konflitu no halo mediasaun.

“Agora liga ho matadalan mediasaun sensível bá jéneru ne’ebé mak atu fahe bá universidade ha’at, UNDIL, UNPAZ, UNITAL no mós UNTL, hanoin hela katak, dala barak estudante sira mós halo sira-nia papel hanesan akademísta ema hotu hanoin hela katak, ema hotu estudante mós iha kbiit iha abilidade atu bele fasilita líderes komunitáriu sira iha prevensaun no rezolusaun konflitu,” dehan nia.

Matadalan mediasaun sensível bá jéneru ne’e importante tebes bá feto sira, nune’e bele aumenta númeru partisipasaun feto hanesan mediadora, tanba feto mós iha papel importante hodi rezolve konflitu no mós konflitu bazeia bá jéneru.

Alem de ne’e, UN WOMEN seo hametin liután kooperasaun ho governu Timor-Leste liu husi Ministériu Interiór, SEPS no DNPKK, hodi institusionaliza maradalan mediasaun sensível bá jéneru bá, nune’e foka bá dezenvolvimentu tuir rezolusaun konsellu seguransa Nasoens Unidas nian 1325 kona-ba feto bá páz no seguransa.(ant)