ESTUDANTE PRÉ ESKOLAR EVENEJER FATU’U, MUNISÍPIU ATAÚRU APRENDE DE’IT IHA AI MAHON

Smnewstimor, 16-06-2023 – Estudante husi Pré Eskolar Evenjer, Aldeia Fatu’u, Suku Bikeli, Munisípiu Ataúru uza de’it ai-mahon hodi aprende, tanba udan no anin ne’ebé akontese iha fulan Dezembru tinan kotuk, sobu kakuluk husi edifísiu eskolar ne’ebé hari’i ho meia parede.

Tuir komunikadu ne’ebe Smnews asesu komfirma, problema ne’e identifika foin lalais ne’e, liu husi vizita ne’ebé realiza husi ekipa Gabinete Sosiedade Sívil no Apoiu Sosiál husi Prezidénsia Repúblika ba Aldeia Fatu’u, Suku Bikeli, Munisípiu Ataúru.

Koordenadora Pré Eskolar Evenjer, Asmiranda Soares Gomes, husu ba Prezidente Repúblika atu apoia reabilitasaun eskola infantil ne’ebé akumula estudante 25, tanba pedidu ne’ebé aprezenta ba Ministériu Edukasaun to’o agora seidauk hetan resposta.
“To’o agora ami seidauk hetan ajuda ruma, ne’e duni husu Prezidente ajuda netik mai ami-nia eskola, hodi nun’e sira nia aprendisajen bele la’o ho di’ak, tanba durante ne’e ami-nia oan sira la-iha fatin, ami hanorin de’it iha ai-mahon, karik udan, hanorin iha ami nia uma, hanorin nafatin ami nia oan sira,” Haktuir Koordenadora Pré Eskolar Evenejer.

Dezastre naturais ne’ebé akontese iha fulan Dezembru tinan kotuk mos sobu edifísiu Eskola Bázika Filiál Fatu’u ne’ebé didin ho au.

“Ami nia kondisaun eskola ladi’ak, ne’e duni husu ba Avo Ramos-Horta atu hadi’a ami nia eskola,” Tenik estudante EBF Fatu’u, Muri Melodia Gomes de Araújo
Koordenadór EBF Fatu’u, Jonas Soares Araújo, relata katak, la iha didin eskola, hodi garante prosesu aprendisajen, tanba ne’e husu apoiu husi Prezidente Repúblika.

“Ha’u hakarak hato’o ba sua Eselénsia Prezidente Repúblika, José Ramos-Horta, durante tinan hirak nia laran ona, kondisaun la di’ak ami nia estudante sira la aprende iha fatin di’ak, sira aprende iha ai hun. Udan mai, sira tenke lori estudante sira ba aprende iha fatin mahon, difisil ba mestre sira atu hanorin oan sira,” Relata nia.

Delegada aldeia Fatu’u, Suku Bikeli, Fernanda da Costa Barbosa mos aprezenta problema ne’ebé mak enfrenta husi pré eskolar Evenejer no EBF Fatu’u.
“Anin bo’ot sobu eskola ida ne’e, la iha fatin di’ak ba sira hodi aprende, sira uza ai-mahon, udan kuandu mai ona, sira tenke sees. Ha’u husu ba Prezidente José Ramos-Horta, ajuda lalais eskola ne’ebe do’ok husi Kapitál Munisípiu Ataúru, para ami nia oan sira bele eskola” Tenik delegada ne’e.

Aldeia Fatu’u la asesu ba estrada no komunidade husi Ataúru Vila ne’ebé atu desloka ho kareta ka motor ba Aldeia Fatu’u, to’o de’it iha Aldeia Akrema, hafoin ho viajen ho bero durante minutu 30 nia laran, hodi to’o iha Fatu’u. (Smnews)