Estrutura CCI-TL Liderado Jorge Serano hasoru VPM1 Kalbuadi Lay

Smnewstl.com – Estrutura Câmara de Comércio e Indústria de Timor-Leste (CCI-TL) hasoru malu ho Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Francisco Kalbuadi Lay hodi ko’alia kona-ba koperasaun servisu entre parte rua.

Hafoin sorumutu, Francisco Kalbuadi Lay hateten, koalia ho setor privadu sira ne’e positivu no importante tebes atu oinsa bele serbisu hamutuk hodi halais liu-tan prosesu dezenvolvimentu iha rai-laran.

“Ohin previleiju tebes, Kontenti teb-tebes hasoru malu ho Prezidente CCI-TL, Jorge Serano ho nia vise Prezidente nain 3 ne’ebé mak prezensa iha ne’e, ita hotu hatene katak kuandu kualker paíz ida nia ekonomia forte kuandu iha setor privadu ne’ebé mak forte.

Apresia saida mak durante ne’e setor privadu sira hala’o ona iha sira nia knaar hanesan setor privadu liuliu iha vida emprezarial,” esplika Kalbuadi Lay

Vise PM ne’e hatutan, sorumutu ne’e hodi fó hanoin malu, saida mak presija atu haree no bele reforsa setor privadu sira liu-liu iha área espesialidade ida-idak nian.

“Ha’u apresia tebes saida mak ohin Prezidente CCI-TL hato’o tiha ona sira nia programa liu-liu iha área dadus, área espesifiku ida-idak nian, no agradese no apresia tebes katak, CCIT-L sira nia operasionalidade la’ós de’it iha nasionál maibé, to’o ona iha munisípiu ne’ebé governu prontu apoiu nune’e mós sai parseiru ida hamutuk ho setor privadu sira,” nia esplika.

Iha fatin hanesan, Prezidente CCI-TL, Jorge Serano sente previleiju agradese tebes tanba, ho Sua Exselensia nia tempu estrutura CCI-TL mai hasoru hanesan Ministru Koordenador ba Asuntu Ekonómiku ne’ebé CCI-TL tutela ba.

“Ami ho laran ksolok bele iha konversa di’ak tebes loke aan husi Vise Primeiru Ministru hanesan Ministru Koordenador ba Asuntu Ekonómiku haree planu ne’ebé hala’o hamutuk ho CCI-TL liuliu atu dezenvolve setor privadu iha futuru.

Hanesan ita hotu hatene planu estratéjiku dezenvolvimentu 2011- 2030 no mós IX Governu nia programa ne’ebé ita haree forsa teb-tebes no liu husi enkontru sira ne’e atu motiva liu tan,”
Prezidente CCI-TL mós agradese ba lia-fuan motivasaun ne’ebé Vise Primeiru Ministru hato’o oinsa setor privadu sira bele serbisu hamutuk.

“Ami ohin rona de’it lia-menon husi señór Vise Primeiru Ministru oinsá setor privadu serbisu hamutuk di’ak liu-tan, hanoin katak ne’e mak ami nia prontidaun hanesan lideransa CCI-TL ho estrutura tomak, emprezariu tomak iha rai-laran no munisípiu agradese ba Sua Exselensia nia tempu tomak nia motivasaun, no konfiansa. Espera katak, ba oin ita serbisu di’ak liu-tan, no ami la nega vise Primeiru Ministru hanesan Ministru Koordenador ba Asuntu Ekonómiku ne’ebé uluk hanesan emprezariu senior ida koñese di’ak área ida ne’e no ami orgullu tanba, ami agora iha ema ida iha pozisaun koñese mós situasaun ida ne’e, ami fiar katak, ami hamutuk ho ami nia senior ida ne’e, hamutuk bele halo buat ruma”.

Nia hatutan, setor privadu iha interese nasionál atu dezenvolve ekonomia, hadia povu nia moris, atu kombate dezempregu iha rai-laran, no mós bele hamrik iha país ida soberanu, la’os soberanu de’it iha politikamente maibé, ekonomikamente tenke soberanu. (Smnews)