Estadu TL Halot Ona Saudozu Max Stahl Nia Sinzas Iha Santa Cruz

Smnewstl.com 17-12-21 (Dili) — Estadu Timor-Leste iha tuku 12:00 meudua halot ona Sesta-feira ne’e, sinzas Saudozu Max Stahl nian iha fatin deskansa ikus nian iha Semitériu Santa Cruz, hafoin presta omenajen durante loron nia laran.

Saudozu Max Stahl hakotu iis iha Ospitál Brisbane Austrália iha loron 28 fulan Outubro, iha tuku 4 dader otl nian, tanba sofre moras komplikadu.

Nune’e, hafoin halo kremasaun ka sunu iha Austrália, iha Kuarta-Feira (15-12-21) família liu-liu Espoza Saudozu Max, Ingreet ho oan na’in tolu, mane rua no feto ida, lori fila saudozu nia sinzas mai halot iha Timor-Leste.

Nune’e, iha loron (17-12-21) Sesta-feira ohin, estadu Timor-Leste halot ona saudozu nia sinzas iha Semitériu Santa Cruz, iha fatin ne’ebé saudozu subar kasete Masakre Santa Cruz 12 Novembru tinan 1991, tanba kasete ne’e mak salva Timor-Leste iha mundu internasionál.

Molok tama bá serimónia funerál no halot saudozu bá fatin deskansa rohan la’ek nian tun bá kampa, estadu Timor-Leste, selebra missa agradesimentu bá saudozu iha Igreja Motael ne’ebé prezide husi Archebispu Arkidioseze Metropolitana Dili, Dom Virgílio do Carmo da Silva.

Hafoin de missa, família boot komité 12 Novembru no povu tomak, lori saudozu nia sinzas ho la’o ain husi Igreja Motael bá Semitériu Santa Cruz, hodi halot iha fatin deskansa ikus nian.

Hafoin hatun bá kampa, Espoza Saudozu Max Stahl, Ingreet ho oan na’in tolu, inklui líder nasionál Timor-Leste nian hanesan, eis Prezidente Repúblika, José Ramos-Horta, Tenente Jenerál Lere Anan Timur, Prezidente Tribunál Rekursu, Deolindo dos Santos, reprezentante Primeiru-Ministru atuál Ministru Prezidénsia Konsellu Ministru, Fidélis Magalhães.

Prezidente komité 12 Novembru no povu tomak ne’ebé partisipa iha serimónia funerál ne’e hodi kari rai rahun bá saudozu nia sinzas iha kampa laran.(Ant)