Smnewstl.com (Mosambike) – Nasaun membru Komunidade Paíz Língua Portugueza (CPLP-sígla portugés) louva ho Timor-Leste nia partisipasaun ativamente iha servisu organizasaun Centro de Análise Estratégica-CAE/CPLP.
Lia hirak ne’e hato’o husi Ministru Negósius Estranjeirus no Kooperasaun (MNEK), Bendito dos Santos Freitas, hafoin reprezenta Prezidente Repúblika, José Ramos-Horta, hala’o vizita ba iha sede CAE/CPLP, iha Maputo, Mosambike. Vizita ne’e simu direta husi Diretór CAE/CPLP, Koronél Armindo Alcides Garcia Sá Miranda Nogueira ho estrutura.
Ministru Bendito Freitas hateten, organizasaun CAE/CPLP harii iha tinan 1996 iha kontestu CPLP nian, ne’ebé ho nia objetivu atu halo análize no peskiza iha área assuntu defeza no seguransa inklui mós estabelese kooperasaun entre nasaun membru CPLP iha setór rua ne’e.
“Sentru ida-ne’ebé estabelesidu iha 1996 to’o agora ho ninia relevánsia makas teb-tebes ba dezenvolvimentu setór análize no peskiza kona-ba assuntus relativamente ba defeza, seguransa no assuntu kooperasaun entre estadus membrus CPLP nian. Husi aprezentasaun señór Koronél Armindo Miranda Sá, ita deskobre katak, importánsia teb-ebes, sira mós louva Timor-Leste nia partisipasaun iha organizasaun ida-ne’ebé importante tebes,” dehan Ministru Bendito.
Alende halo análize no peskiza, CAE/CPLP mós iha sira-nia kalendarizasaun, estruturasaun operasionalizasaun di’ak atu bele fó hanoin no fó konseitus liu-liu kona-ba assuntus estratéjikus sira.
“Ho ida-ne’e mak ita Timor mós partisipa ativamente no ita mós iha kontribuisaun kuota kada tinan $ 6 mill dolares. Ha’u hanoin ita atu kumpre ida-ne’e, nu’udar membru sira seluk kumpre hotu,” katak nia.
Nia hatutan, Mosambike hanesan nasaun resipiente ne’ebé oferese fasilidade esfraestrutura no lojístika no mós kuádru tékniku sira sira-ne’ebé mak operasionaliza atividade CAE/CPLP nian, enkuandu estadu membru sira seluk kontribui kuota dollar rihun $ 6 kada tinan.
Xefe Diplomasia ne’e akresenta, Ministru Defeza ho Komandu F-FDTL iha ona kuiñesimentu kle’an kona-ba kooperasaun CAE/CPLP nian, tanba ne’e, presiza servisu hamutuk hodi bele prepara aan di’ak liután bainhira Timor-Leste simu prezidénsia rotativa atu lidera organizasaun CAE/CPLP ne’e iha futuru.
Entretantu, vizita Ministru Bendito Freitas ba instalasaun Sentru Termoelétrika ne’e, akompañadu husi Diretór-Jerál Bilateral ba Assuntu, Áfrika Europa, Amérika no Médiu Oriente, Francisco Dionísio Fernandes ‘Mau-kura’, Primeira Sekretáriu Embaixada Timor-Leste ba Mosambike, Lenilde Pereira no seluk tan. (*/Smnews)
Komentariu