Smnewstl.com—Ministru Negósiu Estranjeiru no Kooperasaun, Bendito dos Santos Freitas partisipa hanesan observadór iha enkontru Ázia Rejionál Fórum (ARF) bá dala-32 ne’ebé diskute kona-ba seguransa globál no kombate krime sibernétika.
Enkontru ARF partisipa husi Ministru Negósiu Estranjeiru hanesan Amérika, Xína, Rúsia, Kanada, Japaun, Austrália, Korea do Súl, Nova Zelándia, Índia no nasaun membru ASEAN nian sira hodi diskute situasaun iha rejiaun no mundu.
Asuntu prinsipál ne’ebé ko’alia iha ARF mak kona-ba dezafius globál, seguransa, krime sibernétika, seguransa marítima no mós dezenvolvimentu sustentável, inklui mós kestaun denuklearizasaun, kazu Myanmar, South China Sea no seluk tan.
“Sesaun ida importante tebes mak ARF ne’ebé ho líder sira East ASEAN Summit nia Ministru sira mós iha no mós Ministru sira ASEAN nian hotu-hotu iha ne’ebá ko’alia asuntu global ne’ebé importante tebetebes, liu-liu kona-ba dezafius globais, seguransa, krime sibernétika, seguransa marítima no mós dezenvolvimentu sustentável,” informa Ministru Negósiu Estranjeiru, Bendito Freitas.
Ho partisipasaun iha ARF ne’e, Timor-Leste bele aprende no mós fahe Timor-Leste nia esperiénsia kona-ba defende prinsíspiu universal ligadu hanesan direitus umanus, justisa, liberdadade no independénsia sira-nian iha luta ba hametin páz no segunransa mundiál.
“Pozisaun Timor-Leste nian mak ita kontinua defende prinsípiu universais kona-ba direitus umanus, justisa, kona-ba direitu ema nian bá liberdade no independénsia iha estadu direitu bainhira sira iha espresaun kona-ba ida-ne’e liu-liu luta bá páz no seguransa global,” tenik tan.
Durante enkontru ARF, nasaun lubuk ida mak apresia no agradese bá Timor-Leste bá apoiu ne’ebé fó iha nível multilateralizmu liu husi votu afavór bá rezolusaun sira iha Konsellu Seguransa Nasoins Unidas. (*/Smnews)
Komentariu