Embaixadór EUA Entrega Lista Projetu Konstrusaun Aeroportu Baucau Bá PM Taur

Smnewstl.com  Media online— Embaixadór Estadus Unidus Amérika (EUA) iha Timor-Leste, Chales Kevin Blacktstone, entrega ona lista proposta projetu konstrusaun Aeroportu Baucau bá Primeiru-Ministru (PM), Taur Matan Ruak.

Diplomata ne’e hateten, sente ornadu bainhira hasoru malu fali Xefe Governu, Taur Matan Ruak, hodi ko’alia espesífikamente kona-ba dezenvolvimentu projetu konstrusaun aeroportu Baucau nian.

“Primeiru-Ministru simu lista proposta projetu ne’ebé atu hala’o, señór Primeiru-Ministru husu atu halo kontaktu direta ho ministériu relevante sira hanesan, ministériu interiór, ministériu transporte komunikasoens, autoridade aviasaun sivil no instituisaun relevante sira seluk,” informa Embaixadór EUA, Kevin Blacktstone, hafoin remata enkontru ho Xefe Governu iha rezidénsia Farol, Dili. Sesta (23/07/21).

Diplomata ne’e esplika, projetu ne’e, EUA sei fó asisténsia seguransa liu-liu hadi’a lutu perímetru no mós pista aeroportu, inklui apoiu veíkulu hamoos pista nian.

“Projetu seguransa ne’ebé ohin ha’u mensiona ne’e, hamutuk ho projetu rehabilitasaun bá aeroportu inklui hadi’a lutu perímetru haleu aeroportu, fornese veíkulu Bombeiros hamoos pista no mós ekipamentu ne’ebé bele halo aeroportu ne’e funsiona,” subliña nia.

Aviaun rua ne’ebé EUA sei fó apoiu bá FALINTIL Forsa Defeza Timor-Leste (F-FDTL) ne’e, ho objetivu atu halo patrullamentu bá tasi Timór, nune’e bele kombate peskas ilegál iha tasi Timór nian.

“Atu fornese aviaun bá F-FDTL ne’e nia objetivu atu utiliza halo patrullamentu bá tasi Timór, atu nune’e bele deteta atividade peskas ilegál sira iha área marítima Timor-Leste nian,” tenik nia.

Projetu Konstrusaun bá aeroportu refere, sei kompleta mós fatin parajen aviaun rua ne’ebé EUA CS 206, inklui ekipamentu umanitáriu seluk ne’ebé sei ajuda husi aeroportu ne’e nia funsionamentu no mós bá autoridade aviaun sivil nia nesessidade.

PM Taur mós husu Diplomata EUA ne’e atu servisu hamutuk ho liña ministériu sira-ne’ebé iha relasaun ho projetu refere, nune’e bele aselera prosesu ne’e.

Entretantu, foin lalais ne’e, Governu Timor-Leste liu husi Primeiru-Ministru, Taur Matan Ruak, hamutuk ho embaixadór EUA iha Timor-Leste, Kevin Blacktstone, hatur ona fatuk dahuluk bá konstrusaun aeroportu Baucau.(ant)