Embaixadór 5 Simu Orientasaun Husi PM Taur

Smnewstl.com  Media Online— Embaixadór timoroan na’in-5 hasoru malu ho Primeiru-Ministru (PM), Taur Matan Ruak hodi simu orientasaun molok desloka bá hala’o misaun ida-idak nian iha nasaun ne’ebé sira destaka bá li’ur.

Embaixadór Permanente Timor-Leste Bá Organizasaun Nasoens Unidas (ONU), Karlito Nunes hateten, semana kotuk, sira simu ona posse husi Presidente Repúblika (PR), Francisco Guterres Lú-olo, hodi nomeia sira atu reprezenta estadu Timor-Leste iha rai li’ur.

“Ohin ami iha ne’e rona orientasaun barak husi exelénsia Primeiru-Ministru saida mak ami hanesan Embaixadór bele halo iha rai li’ur lori estadu no nasaun nia naran bele halao iha rai li’ur no bele promove ita-nia nasaun iha rai li’ur,” dehan Embaixadór Timor-Leste bá ONU Nova Yorke, Karlito Nunes, hafoin remata enkontru ho Xefe Governu iha rezidénsia Farol, Dili.

Diplomata ne’e informa, orientasaun ne’ebé simu husi Xefe Ezekutivu maka, bainhira atu foti desizaun ruma iha li’ur, presiza konsertasaun polítika iha rai laran, molok halo desizaun.

“Klaru hanesan reprezentante nasaun hanesan Embaixadór, orientasaun sira-ne’e hotu-hotu kuandu iha desizaun ruma ou kuandu negosiasaun sempre iha konsertasaun polítika iha rai laran antes ami foti hanoin ruma ou desizaun ruma iha misaun ne’ebé ami ké ami hala’o iha rai li’ur,” dehan Karlito.

Embaixadór RDTL na’in-5 empossados hosi Prezidente Repúblika iha Rezidensia Ofisial PM, Farol mak hanesan Embaixadór Abel Guterres ba Brunei Darussalam, Embaixadóra Felicidade de Sousa Guterres ba Nova Zelandia.

Embaixadór Eusebio Corsino de Araújo ba Kuba, Embaixadór Karlito Nunes hanesan Reprezentante Permanente RDTL hamutuk ho Missaun Permanente ba Organizasaun Nasõens Unidas, Embaixadór Adão Soares Barbosa hanesan Enviadu Spesiál ho Kategoria Embaixadór Itinerante RDTL ba Assuntus Klimátikus.

Tuir planu, diplomata timoroan na’in-5 ne’e, sei desloka bá nasaun ne’ebé sira destaka bá hodi hala’o misaun reprezenta estadu Timor-Leste iha li’ur iha loron 6 fulan-augustu tinan 2021.(ant)