Eletrisidade Iha Merkadu Tasibesi La Funsiona, AMD La Liga

Smnewstl.com 28-08-2021 (Dili) — Koordenadór Merkadu Tasibesi, António Manuel de Araújo husu, Autoridade Munisípiu Dili (AMD) atu hadi’a fasilidade hanesan liña eletrisidade ho portaun terminál iha merkadu Tasibesi ne’ebé avaria hotu ona.

António de Araújo hateten, fasilidade estadu iha merkadu Taibessi ne’ebé presiza hadi’a mak hanesan, liña eletrisidade, portaun terminál, no seluk tan, nune’e pessoál seguransa ne’ebé halo kontrolu iha tempu kalan.

Nia hatutan, liña eletrisidade iha merkadu Taibessi avaria desde tinan 2020, no nia hato’o ona problema ne’e, maibé to’o agora autoridade munisípiu Dili seidauk rezolve.

“Eletrisidade mate komesa iha 2020 avaria, maibé tanba buat sira-ne’e ita haree bá situasaun governu, mais agora iha ona tékniku balun husi munisípiu mai haree katak, fó ona bá iha kompañia sira atu mai halo, iha ne’e tékniku sira mai haree diretamente, ha’u lori bá hatudu hotu-hotu sira haree, lori bá iha munisípiu depois iha ne’ebá mak prosesu bá kompañia,” dehan Koordenadór António de Araújo, iha knár fatin merkadu Taibessi sábdu ohin.

Responsável ne’e informa, iha ona kompañia lokál balun observa ona, maibé sei prepara hela dezeñu ho Bill of Quantity (BoQ), nune’e bele hahú ezekuta obra.

Kona-ba kondisaun haris fatin no sintina iha merkadu Taibessi, Koordenadór ne’e dehan, antes ne’e avaria, maibé autoridade munisípiu Dili konsege hadi’a fali ona.

Maibé, autoridade munisípiu Dili kontrata ona kompañia nasionál balun semana supa dala rua ho kareta tanki 6.

“Iha ne’e fasilidade bá merkadu Taibessi primeiru estár ita haree ahi eletrisidade mate hotu, tenki iha konstrusaun, segundu ita haree bá portaun terminál, kuandu iha serka hanesan ne’e ita agora uza maneira par ita bele taka lai, no mós besi valeta balun iha estasionamentu presiza hadi’a,” rekomenda nia.

Alem de ne’e, Koordenadór Merkadu Taibessi ne’e mós husu Autoridade Munisípiu Dili no mós governu atu haree didi’ak futuru merkadu Taibessi nian, nune’e vendedór sira iha tempu kalan tenki fila bá toba iha uma, maibé labele hela iha merkadu laran hanesan uma.

“No mós oinsá merkadu bá futuru ita atu haree par vendedores ne’e fila bá uma, dadersan mai halo negósiu lokraik tenki fila bá uma, labele uza iha ne’e, tanba hotu-hotu fa’an hela iha ne’e depois buat sira-ne’e kuandu la toma atensaun kuidadu didi’ak, governu tenki hadi’a, ha’u hanoin planu ida-ne’e bá iha leten mak hadi’a,” preukupa nia.

Pessoál ne’ebé servisu iha merkadu Taibessi hamutuk 43, kompostu husi servisu limpeza areadores merkadu, seguransa no seluk tan.

Ba informasaun ne’e rasik Autoridade Municipal Dili seidauk aprezenta pozisaun.(ant)