Eleitor Rihun Sanulu Resin Asina Lori Armanda Berta ba Aiatrak Laran, Pronto Husik Partido

Smnewstl.com 20-01-2022 (Dili) — Kandidata Prezidente Repúblika (PR), periódu 2022-2027, Armanda Berta dos Santos deklara, karik eleitu bá PR maka sei rejigna aan husi kargu hanesan Prezidente Partidu Klibur Haburas Unidade Nasionál Timor Oan (KHUNTO).

Armanda Berta esplika, rajaun rejigna aan husi kargu nu’udar Prezidente Partidu KHUNTO, tanba hakarak sai Presidente ba bá ema hotu no timoroan tomak, la’ós bá militantes no apoiante KHUNTO nian de’it.

“Sé karik ha’u mak eleitu bá PR iha rai doben Timor-Leste, maka ha’u sei deklara rejigna aan husi kargu Prezidente Partidu KHUNTO,” deklara Kandidata PR, Armanda Berta dos Santos, iha salaun Esperansa Elemloi Delta, Dili, kinta ne’e.

Armanda Berta dos Santos deklara, nia prontu ona atu kandidata aan bá Prezidente Repúblika periódu 2022-2027, hodi serví povu no nasaun.

“Ho biban ida-ne’e mós ha’u hakarak deklara katak, sé karik povu Timor-Leste fó fi’ar mai ha’u atu sai hanesan imi-nia Prezidente ne’ebé nakonu ho esperansa atu tau matan bá nasaun Timor-Leste ho di’ak, mak ha’u sei hakruk hodi serví povu no nasaun ne’e tuir ita-nia konstituisaun haruka,” subliña Berta.

Armanda Berta promete, karik povu fó fi’ar bá nia iha eleisaun prezidensiál hodi sai PR, mak nia sei halo tuir de’it konstituisaun RDTL no mós prinsípiu fundamental liu-liu hametin estadu direitu demokrátiku, páz no establidade nasionál, hodi lori dezenvolvimentu nasionál bá povu.

Alem de ne’e, Berta subliña, bainhira eleitu bá PR mós, sei hametin di’ak liután relasaun bilaterál ho nasaun sira iha mundu, atu bele habelar liután polítika externa Timor-Leste nian.

Entretantu, dadauk, ekipa susesu rekolla ona kartaun eleitorál husi apoiante sira-ne’ebé fó apoiu bá Kandidata PR, Armanda Berta dos Santos hamutuk rihun 10 resin ona.

Armanda Berta mós apela bá povu tomak, atu partisipa iha festa demokrasia eleisaun prezidensiál ne’e ho maduru, atu nune’e ema hotu bele hakat bá sentru votasaun no di’ak no seguru hodi hili PR foun atu lidera nasaun ne’e.

Entretantu, Prezidente Repúblika (PR), Francisco Guterres Lú-olo dekreta ona kalendáriu eleisaun prezidensiál ne’ebé sei hala’o iha loron 19 fulan Marsu 2022.

Iha biban ne’e, intrega mos lista apoiante husi ekipa susesu liderado Marito Magno ba kandidatu Armanda Berta dos Santos atual Presidente Partido Khunto nomos mapa Timor husi Konsileiro Masimu Jose dos Santos Naimori Bucar nudar simblu komfiansa atu lori nasaun ba oin.

Tuir lista apoiante ne’ebe intrega ho total rihun sanulu resin husi teritorio ne’ebe hakarak lori Armanda Berta ba Aiatarak Laran.(ant)